2024 ലെ പാരീസ് ഒളിമ്പിക്സ് ഈ മാസം (ജൂലൈ) 26 മുതൽ ഓഗസ്റ്റ് 11 വരെയാണ്. മൂന്നാം തവണയാണ് (1900, 1924, 2024) പാരീസ് ആതിഥേയരാകുന്നത്. 80,000-ത്തിലധികം ആളുകൾക്ക് ഇരിക്കാൻ പറ്റുന്ന രാജ്യത്തെ ഏറ്റവും വലിയ സ്റ്റേഡിയമായ സെൻ്റ് ഡെനിസിലെ സ്റ്റേഡ് ഡി ഫ്രാൻസ് ഒളിമ്പിക്സിൻ്റെ മുഖ്യ സ്റ്റേഡിയമായിരിക്കും.
മെട്രോപൊളിറ്റൻ ഫ്രാൻസിലെയും താഹിതിയിലെയും 17 വ്യത്യസ്ത നഗരങ്ങളിലായാണ് ഗെയിമുകൾ നടക്കുക. പാരീസിൽ നിന്ന് 9,765 മൈൽ അകലെയുള്ള ഫ്രഞ്ച് പോളിനേഷ്യൻ ദ്വീപായ താഹിതിയിലെ ടഹൂപോവോയിലാണ് രണ്ട് ദിവസത്തെ സർഫിംഗ് മത്സരങ്ങൾ നടക്കുന്നത്.
ഉദ്ഘാടന ചടങ്ങ് ജൂലൈ 26 ന് പാരീസിൻ്റെ ഹൃദയഭാഗത്ത് സീൻ നദിക്കരയിൽ നടക്കും. സമ്മർ ഗെയിംസിൻ്റെ ചരിത്രത്തിൽ ആദ്യമായാണ് ഒരു സ്റ്റേഡിയത്തിനുള്ളിൽ ചടങ്ങ് നടക്കാതെ പുറത്തൊരിടത്ത് വെച്ച് നടക്കാൻ പോകുന്നത്.
2024-ലെ പാരീസ് ഒളിമ്പിക്സിൻ്റെ ഭാഗ്യചിഹ്നം ഒളിമ്പിക് ഫ്രിജ് ആണ്. നീല, വെള്ള, ചുവപ്പ് (ഫ്രാൻസിൻ്റെ പതാകയുടെ നിറങ്ങൾ) എന്നീ നിറങ്ങളിലുള്ള ചിഹ്നം പരമ്പരാഗത ഫ്രിജിയൻ ചുവന്ന തൊപ്പിയുടെ ആകൃതിയും രൂപവും അടിസ്ഥാനമാക്കിയുള്ളതാണ്. രാജ്യത്തിൻ്റെ ചരിത്രത്തിലുടനീളം ഫ്രാൻസിൻ്റെ സ്വാതന്ത്ര്യത്തിൻ്റെ പ്രതീകമാണ് തൊപ്പി.
ഒളിമ്പിക്സിൽ 10,500 കായികതാരങ്ങൾ പങ്കെടുക്കും. ഐഒസിയുടെ കണക്കനുസരിച്ച് 2024 ലെ ഗെയിംസിൽ പുരുഷന്മാരും സ്ത്രീകളും തുല്യ എണ്ണം പങ്കെടുക്കുന്ന ആദ്യ ഗെയിമായിരിക്കും ഇത്. മൊത്തം 206 രാജ്യങ്ങൾ പങ്കെടുക്കും.
നാല് പുതിയ കായിക ഇനങ്ങൾ ഒളിമ്പിക്സിൽ ഉൾപ്പെടുത്തിയിട്ടുണ്ട്. ബ്രേക്കിംഗ്, സ്കേറ്റ്ബോർഡിംഗ്, സ്‌പോർട്‌സ് ക്ലൈംബിംഗ്, സർഫിംഗ്. 2024-ലെ പാരീസ് ഒളിമ്പിക്സിൽ 329 മെഡൽ ഇനങ്ങളുണ്ടാകും.