ഗുരുവായൂർ ക്ഷേത്രത്തിലെ ഈ വർഷത്തെ തൃപ്പുത്തരി ഞായറാഴ്ച.രാവിലെ 8.30നും 9.30നും ഇടയിലുള്ള മുഹൂർത്തത്തിൽ ആഘോഷിക്കും. ഇതിന്റെ ഭാഗമായി ഭക്തർക്കായി 1200 ലിറ്റർ പുത്തരി പായസമാണ് ദേവസ്വം തയ്യാറാക്കുന്നത്. പായസം കൂടുതൽ സ്വാദിഷ്ടമാക്കുന്നതിനായി 2200 കദളിപ്പഴവും 22 കിലോ നെയ്യും ഇതിൽ ഉപയോഗിക്കുന്നുണ്ട്. പായസത്തിനായുള്ള ടിക്കറ്റ് വിതരണം ആഗസ്റ്റ് 29 ശനിയാഴ്ച വൈകിട്ട് നാല് മണി മുതൽ തെക്കേനട കൗണ്ടറിൽ ആരംഭിക്കും. 250 മില്ലി പായസത്തിന് 60 രൂപയാണ് നിരക്ക്. ഒരാൾക്ക് പരമാവധി 120 രൂപയുടെ ടിക്കറ്റ് എടുക്കാം. ഡബ്ബ ആവശ്യമുള്ളവർ 20 രൂപ അധികം നൽകണം. ആഗസ്റ്റ് 30ന് ഉച്ചപൂജയ്ക്ക് ശേഷം പായസം പ്രസാദമായി ഭക്തർക്ക് ലഭിക്കുമെന്ന് ഗുരുവായൂർ ദേവസ്വം ബോർഡ് അറിയിച്ചു.