ജന്തർ മന്ദറില്‍ അതിക്രമിച്ച്‌ കയറിയ കേസില്‍ കോക്രോച്ച്‌ ജനതാ പാർട്ടി (സിജെപി) നേതാക്കളെ അഞ്ച് ദിവസത്തെ ജുഡീഷ്യല്‍ കസ്റ്റഡിയില്‍ വിട്ട് കോടതി.നേതാക്കളായ സൗരവ് ദാസ്, അശുതോഷ് റാങ്ക എന്നിവരെയാണ് കസ്റ്റഡിയില്‍ വിട്ടത്. മറ്റൊരു നേതാവ് അജിങ്ക്യ ഷിൻഡേയ്ക്ക് ഉപാധികളോടെ ജാമ്യം അനുവദിച്ചു. ഇന്ന് രാവിലെ എട്ടുമണിക്കാണ് മൂന്ന് നേതാക്കളെയും ഡല്‍ഹിയിലെ മന്ദിർ മാർഗിലുള്ള മജിസ്ട്രേറ്റിന് മുന്നില്‍ ഹാജരാക്കിയത്.സൗരവിനെയും അശുതോഷിനെയും കസ്റ്റഡിയില്‍ വിട്ടതായി സിജെപി സ്ഥാപകൻ അഭിജീത് ദീപ്കെ തന്റെ എക്സ് പേജിലൂടെ അറിയിച്ചിട്ടുണ്ട്. അപ്പീല്‍ നല്‍കുമെന്നും അഭിജീത് അറിയിച്ചു. അവർ ചെയ്തത് തെറ്റാണോയെന്നും പ്രധാനമന്ത്രി നരേന്ദ്ര മോദി അല്പം ധൈര്യം കാണിക്കൂവെന്നും അഭിജീത് കുറിച്ചു.