“സംഘി”യും “സുഡാപ്പി” യും “കൃസംഘി”യും കുടുംബങ്ങൾ സമേതം പുതുവർഷനാളിൽ ഒത്തുചേരുന്നതും തുടർന്നുള്ള സംഭവവികാസങ്ങളുമാണ് പികെ സുനിൽനാഥ് കഥയും തിരക്കഥയും സംഭാഷണവും എഴുതി നിർമ്മിച്ച് സംവിധാനം ചെയ്യുന്ന മുറിവുകൾ പുഴയാകുന്നു എന്ന സിനിമ പറയുന്നത്.
പ്രശസ്ത ഛായാഗ്രാഹകനായ കെ പി നമ്പ്യാതിരിയാണ് ചിത്രത്തിന്റെ ഡിഒപി.
മോജി ടി വർഗീസ് ആണ് ചിത്രസംയോജകൻ.
സംഗീതസംവിധാനം ഡോ: സാം കടമ്മനിട്ടയും കലാസംവിധാനം പ്രമോദ് കൂരമ്പാല, സജി, ഗ്ലാറ്റൻ പീറ്റർ തുടങ്ങിയവർ ചേർന്നു നിർവഹിച്ചിരിക്കുന്നു.എക്സിക്യൂട്ടീവ് പ്രൊഡ്യൂസർ ഷീബ സുനിൽനാഥ്.
വി കെ ഉണ്ണികൃഷ്ണനാണ് അസോസിയേറ്റ് ഡയറക്ടർ.
ചഞ്ചൽ സേതുപർവതിയാണ് ചിത്രത്തിൻെറ കോസ്റ്റ്യും ഡിസൈനർ.
സമൂഹമാധ്യമങ്ങളിലൂടെയും മറ്റും കണ്ടെത്തിയ കുട്ടികൾ ഉൾപ്പെടെയുള്ള 37 ഓളം പുതുമുഖങ്ങളെ ഡോ: ചന്ദ്രദാസൻ ലോകധർമ്മിയുടെ നേതൃത്വത്തിൽ വൈപ്പിൻ നായരമ്പലത്തെ നാടകവീട്ടിൽ അഞ്ചു നാൾ പരിശീലന കളരിയിൽ സജ്ജമാക്കിയ ശേഷമായിരുന്നു ചിത്രത്തിന്റെ ചിത്രീകരണം.
കൊറോണ കാലത്തിനു മുൻപ് ചിത്രീകരണം പൂർത്തിയാക്കിയ സിനിമ ഒട്ടേറെ പ്രതിസന്ധികളെ അഭിമുഖീകരിച്ച് അതിജീവിച്ചാണ് ഇപ്പോൾ പ്രദർശനത്തിനെത്തുന്നത്.
പരമ്പരാഗത സിനിമ സങ്കൽപ്പങ്ങളിൽ നിന്നും മാറി നടന്ന് പ്രേക്ഷകന്റെ ആസ്വാദനക്ഷമതയെ മാറ്റി ചിന്തിപ്പിക്കുന്നതിനു വേണ്ടിയുള്ള എളിയ ചലച്ചിത്രശ്രമം കൂടിയാണിതെന്ന് എഴുത്തുകാരനും സംവിധായകനുമായ പി കെ സുനിൽനാഥ് പറയുന്നു.
മൂന്നു പതിറ്റാണ്ടിനപ്പുറം ദൃശ്യമാധ്യമ രംഗത്ത് തുടർ പ്രവർത്തനങ്ങൾ നടത്തി സജീവമായി നിൽക്കുന്നതിന്റെ പ്രഥമ ഫീച്ചർ സിനിമ സംരംഭമാണ് മുറിവുകൾ പുഴയാകുന്നു.
