കോട്ടയം: മികച്ച പ്രവർത്തനം കാഴ്ചവച്ച തദ്ദേശ സ്വയം ഭരണസ്ഥാപനങ്ങൾക്കു തദ്ദേശ സ്വയംഭരണ വകുപ്പ് ഏർപ്പെടുത്തിയ സ്വരാജ് ട്രോഫിയിൽ പുരസ്‌കാര നേട്ടവുമായി കോട്ടയം ജില്ല.
സംസ്ഥാനത്തെ മികച്ച ബ്ലോക്ക് പഞ്ചായത്തായി വൈക്കത്തെ തെരഞ്ഞെടുത്തു. മികച്ച ഗ്രാമപഞ്ചായത്തുകളുടെ പട്ടികയിൽ ജില്ലയിലെ മരങ്ങാട്ടുപിള്ളി ഗ്രാമപഞ്ചായത്ത് മൂന്നാം സ്ഥാനവും നേടി.
സ്വരാജ് ട്രോഫി പുരസ്‌കാരത്തിന് ജില്ലാതലത്തിൽ ഗ്രാമപഞ്ചായത്ത് വിഭാഗത്തിൽ തിരുവാർപ്പ്, വെളിയന്നൂർ ഗ്രാമപഞ്ചായത്തുകൾ ഒന്നും രണ്ടും സ്ഥാനങ്ങൾക്ക് അർഹരായി.
തൊഴിലുറപ്പ് പദ്ധതി മികവിന്റെ നേട്ടത്തിൽ നൽകുന്ന മഹാത്മാ പുരസ്‌കാരത്തിന് ജില്ലാ അടിസ്ഥാനത്തിൽ മറവൻതുരുത്ത്, തലയാഴം ഗ്രാമപഞ്ചായത്തുകളെ തെരഞ്ഞെടുത്തു.
സംസ്ഥാനതലത്തിൽ ഒന്നാം സ്ഥാനം ലഭിക്കുന്ന ബ്ലോക്ക് പഞ്ചായത്തിന് 40 ലക്ഷം രൂപയും സ്വരാജ് ട്രോഫിയും സാക്ഷ്യ പത്രവുമാണ് നൽകുന്നത്.
വൈക്കം ബ്ലോക്ക് പഞ്ചായത്തിനോടൊപ്പം കാസർകോട് ജില്ലയിലെ നീലേശ്വരം ബ്ലോക്കും മലപ്പുറം ജില്ലയിലെ പെരുമ്പടപ്പ് ബ്ലോക്കും ഒന്നാം സ്ഥാനത്തേക്ക് തെരഞ്ഞെടുത്തതിനാൽ പുരസ്‌കാരത്തുക തുല്യമായി നൽകും.
മരങ്ങാട്ടുപ്പള്ളി ഗ്രാമപഞ്ചായത്തിന് പുരസ്‌കാരത്തുകയായി 30 ലക്ഷം രൂപയും സ്വരാജ് ട്രോഫിയും സാക്ഷ്യപത്രവും ലഭിക്കും.
ജില്ലാ അടിസ്ഥാനത്തിൽ ഒന്നും രണ്ടും സ്ഥാനങ്ങൾ കരസ്ഥമാക്കിയ പഞ്ചായത്തുകൾക്ക് അവാർഡ് തുകയായി 20 ലക്ഷം, 10 ലക്ഷം രൂപയും സ്വരാജ് ട്രോഫിയും സാക്ഷ്യപത്രവും നൽകും.
പൊതുഭരണം, സംരംഭക പ്രവർത്തനങ്ങൾ, മാലിന്യമുക്ത പ്രവർത്തനങ്ങൾ, കേന്ദ്ര- സംസ്ഥാനാവിഷ്‌കൃത പദ്ധതികൾ, ജെൻഡർ സൗഹൃദ പ്രവർത്തനങ്ങൾ, ജനസൗഹൃദ പ്രവർത്തനങ്ങൾ, ആരോഗ്യമേഖല എന്നീ മേഖലകളിൽ കാഴ്ചവച്ച മികച്ച പ്രവർത്തനങ്ങളുടെ അടിസ്ഥാനത്തിലാണ് ജില്ലയിലെ തദ്ദേശ സ്വയംഭരണ സ്ഥാപനങ്ങൾ സ്വരാജ് ട്രോഫിക്ക് അർഹരായത്.
മികവ് തുടർന്നു തിരുവാർപ്പ് ഗ്രാമപഞ്ചായത്ത്
കോട്ടയം: തുടർച്ചയായ രണ്ടാംതവണയും സ്വരാജ് ട്രോഫി പുരസ്‌കാരത്തിൽ ജില്ലയിൽ മുന്നിലെത്തി തിരുവാർപ്പ് ഗ്രാമപഞ്ചായത്ത്.
മികച്ച പ്രവർത്തനം കാഴ്ചവച്ച തദ്ദേശ സ്വയം ഭരണസ്ഥാപനങ്ങൾക്കു തദ്ദേശ സ്വയംഭരണ വകുപ്പ് ഏർപ്പെടുത്തിയ സ്വരാജ് ട്രോഫിയിൽ ജില്ലാതലത്തിൽ ഒന്നാമതെത്തിയ തിരുവാർപ്പ് ഗ്രാമപഞ്ചായത്തിന് 20 ലക്ഷം പുരസ്‌കാരത്തുകയും സ്വരാജ് ട്രോഫിയും സാക്ഷ്യപത്രവും ലഭിക്കും.
2022-23 വർഷത്തിൽ തിരുവാർപ്പ് ഗ്രാമപഞ്ചായത്ത് പദ്ധതി നിർവഹണത്തിൽ 96 ശതമാനവും പൂർത്തികരിച്ചാണ് തുടർച്ചയായ രണ്ടാം പുരസ്‌കാരത്തിന് അർഹമായത്.
പശ്ചാത്തല വികസനം, കൃഷി, മാലിന്യ സംസ്‌കരണം, പ്രകൃതിസംരക്ഷണം, ടൂറിസം മുതലായ മേഖലകളിൽ ഗ്രാമപഞ്ചായത്ത് കൈവരിച്ച നേട്ടങ്ങൾ, സംസ്ഥാന സർക്കാരിന്റെ ദാരിദ്ര്യ ലഘൂകരണ പദ്ധതികളുമായി ബന്ധപ്പെട്ടു നടപ്പാക്കിയ പ്രവർത്തനങ്ങൾ, പ്രാദേശിക സാമ്പത്തിക വികസനം ലക്ഷ്യമിട്ടുള്ള വരുമാന പദ്ധതികൾ ടൂറിസം മേഖലയുടെ ഉന്നമനത്തിനായി നടത്തിയ പ്രവർത്തനങ്ങൾ എന്നിവയാണു തിരുവാർപ്പ് പഞ്ചായത്തിനെ പുരസ്‌കാരത്തിന് അർഹമാക്കിയത്.
പഞ്ചായത്തിലെ 14 വാർഡുകളും നികുതി ഇനത്തിൽ 100 ശതമാനം കളക്ഷൻ പൂർത്തീകരിക്കുകയും ചെയ്തു.
മാലിന്യ നിർമാർജനത്തിനായി ശ്രദ്ധേയമായ പ്രവർത്തനങ്ങളാണ് ഗ്രാമപഞ്ചായത്ത് നടപ്പാക്കിയത്. പഞ്ചായത്തിൻറ പരിധിയിൽ മാലിന്യം നിക്ഷേപിച്ചു കൊണ്ടിരുന്ന 45 പൊതു ഇടങ്ങൾ കണ്ടെത്തി അവിടെ പൂർണ്ണമായും ശുചീകരിച്ചു.
ഹരിതകർമ്മ സേന കവറേജും യൂസർ ഫീ ശേഖരണവും നൂറ് ശതമാനത്തിൽ എത്തിച്ചു. പഞ്ചായത്തിലെ എല്ലാ വാർഡുകളിലും വീടുകളിൽ സൂക്ഷിച്ചിട്ടുള്ള അജൈവ മാലിന്യങ്ങൾ ശേഖരിച്ച് ക്ലീൻ കേരളാ കമ്പനിക്ക് കൈമാറി.
ജലാശയങ്ങളിലെ പ്‌ളാസ്റ്റിക്ക് മാലിന്യങ്ങൾ നീക്കം ചെയ്തും പഞ്ചായത്ത് പരിധിയിലെ വിവിധങ്ങളായ സ്ഥലങ്ങളിൽ മനോഹരമായ പൂന്തോട്ടങ്ങൾ ഒരുക്കുകയും ചെയ്ത് മാലിന്യമുക്ത ഗ്രാമപഞ്ചായത്ത് എന്ന് നേട്ടവും കൈവരിച്ചിരുന്നു.
കാർഷിക മേഖലയിൽ നെൽവിത്ത് വിതരണം, പച്ചക്കറി ഗ്രാമം പദ്ധതി, കേരഗ്രാമം പദ്ധതി തുടങ്ങിയവ നടപ്പാക്കി.
പഞ്ചായത്ത് പരിധിയിൽപ്പെട്ട ഭിന്നശേഷിക്കാരെ സർവേയിലൂടെ കണ്ടെത്തി അവരുടെ വിവരങ്ങൾ, ആവശ്യങ്ങൾ എന്നിവ കണ്ടെത്തി അവരുടെ ഉന്നമനത്തിനുള്ള പ്രവർത്തനത്തനങ്ങൾക്ക് തുടക്കമിട്ടു.
കാലാവസ്ഥ വ്യതിയാനവുമായി ബന്ധപ്പെട്ടുള്ള പ്രവർത്തനങ്ങൾ, നെറ്റ് സീറോ കാർബൺ പദ്ധതി, വയോജനങ്ങൾക്കായി ഓരോ വാർഡിലും വയോജന അയൽക്കൂട്ടങ്ങൾ, ക്‌ളബുകൾ എന്നിവയും രൂപീകരിച്ചു.
സ്ത്രീകൾക്കായി യോഗ പരിശീലനവും വെൽനസ് സെന്ററുകളും സ്ഥാപിച്ചു. 2024-25 സാമ്പത്തിക വർഷത്തിൽ 35,53,74,132 രൂപയാണ് ഗ്രാമപഞ്ചായത്ത് വികസന പ്രവർത്തനങ്ങൾക്കായി ബജറ്റിൽ വകയിരുത്തിയിരിക്കുന്നത്.
നവകേരള നിർമ്മിതിക്കായി തദ്ദേശ സ്വയംഭരണ സ്ഥാപനം ഏറ്റെടുത്ത് നടപ്പാക്കേണ്ട പ്രവർത്തനങ്ങൾ നടപ്പാക്കുമെന്നും തുടങ്ങി വെച്ച ജനക്ഷേമ പ്രവർത്തനങ്ങൾ തുടരുമെന്നും ഗ്രാമപഞ്ചായത്ത് പഞ്ചായത്ത് അജയൻ കെ. മേനോൻ പറഞ്ഞു.
മികവിൽ രണ്ടാമതെത്തി വെളിയന്നൂർ ഗ്രാമപഞ്ചായത്ത്
കോട്ടയം: ഭരണ വികസന ക്ഷേമ പ്രവർത്തനങ്ങൾ വിലയിരുത്തി മികച്ച പ്രകടനം കാഴ്ചവയ്ക്കുന്ന തദ്ദേശ സ്വയം ഭരണ സ്ഥാപനങ്ങൾക്ക് നൽകുന്ന സ്വരാജ് ട്രോഫി പുരസ്‌കാരത്തിൽ ജില്ലയിൽ രണ്ടാം സ്ഥാനം കരസ്ഥമാക്കി വെളിയന്നൂർ ഗ്രാമപഞ്ചായത്ത്.
പത്ത് ലക്ഷം രൂപയും സ്വരാജ് ട്രോഫിയും സാക്ഷ്യപത്രവുമാണ് പുരസ്‌കാരം.
ഗ്രാമപഞ്ചായത്തിൽ നടപ്പാക്കുന്ന വാർഷിക പദ്ധതിയിലെ പ്രവർത്തനങ്ങളുടെ മികവ്, സംരംഭങ്ങൾ ആരംഭിക്കുന്നതിൽ കാണിച്ച വേറിട്ട ഇടപെടലുകൾ, ആരോഗ്യ-വിദ്യഭ്യാസ മേഖലയിലെ നേട്ടങ്ങൾ, അതി ദാരിദ്ര നിർമാർജനത്തിലും, മാലിന്യ മുക്ത പ്രവർത്തനത്തിലേയും നേട്ടങ്ങൾ, ഭിന്നശേഷി സൗഹൃദ സമീപനം തുടങ്ങിയ മേഖലകളിലെ പ്രവർത്തനങ്ങൾ എന്നവയാണ് വെളിയന്നൂർ ഗ്രാമപഞ്ചായത്തിനെ പുരസ്‌കാര നേട്ടത്തിൽ എത്തിച്ചത്.
വാർഷിക പദ്ധതി പ്രവർത്തനങ്ങൾ സമയബന്ധിതമായി പൂർത്തീകരിച്ച് നൂറു പദ്ധതി പ്രവർത്തനം പൂർത്തിയാക്കിയ ഗ്രാമപഞ്ചായത്താണു വെളിയന്നൂർ.
കെട്ടിട നികുതി സമാഹരിക്കുന്ന രംഗത്തും ജില്ലയിൽ മികച്ച പ്രവർത്തനമാണ് വെളിയന്നൂർ ഗ്രാമപഞ്ചായത്ത് കാഴ്ചവയ്ക്കുന്നത്.
പഞ്ചായത്ത് പരിധിയിലെ പൊതുകുളങ്ങൾ എല്ലാം നവീകരിക്കുകയും ചെയ്തു. മാനസിക വെല്ലുവിളി നേരിടുന്ന കുട്ടികളെ സമൂഹത്തിന്റെ മുഖ്യധാരയിൽ എത്തിക്കുന്നതിന്റെ ഭാഗമായി വെളിയന്നൂരിലെ ബഡ്സ് സ്‌കൂൾ അനുകരണീയ മാതൃകയാണ്.
വെളിയന്നൂർ കുടുംബാരോഗ്യ കേന്ദ്രത്തിന് നാഷനൽ ക്വാളിറ്റി അഷ്വറൻസ് സ്റ്റാൻഡേർഡ് അംഗീകാരം തുർച്ചയായി രണ്ടു തവണ ലഭിച്ചു.
കുടുംബാരോഗ്യകേന്ദ്രത്തിന് കീഴിലെ നാല് സബ് സെന്ററുകളെയും ജനകീയ ആരോഗ്യ കേന്ദ്രമായി ഉയർത്തിയ ഗ്രാമപഞ്ചായത്താണ് വെളിയന്നൂർ.
ഒൻപത് പുതിയ സംരംഭങ്ങളിലൂടെ ഗ്രാമപഞ്ചായത്തിലെ 42 കുടുംബശ്രീ അംഗങ്ങൾക്ക് തൊഴിൽ നൽകാനായി.
എൽ.ഇ.ഡി. നിർമാണ യൂണിറ്റ്, ഹോട്ടൽ, ഭക്ഷ്യ നിർമാണ യൂണിറ്റുകൾ, ജൈവവളം യൂണിറ്റ്, വസ്ത്രനിർമാണ യൂണിറ്റുകൾ, ഇടി ഇറച്ചി നിർമാണ യൂണിറ്റ്, അച്ചാർ നിർമാണ യൂണിറ്റ്, ദോശമാവ് നിർമാണ യൂണിറ്റ്, വെളിയന്നൂർ ബഡ്സ് സ്‌കൂളിലെ ഭിന്നശേഷി കുട്ടികളുടെ അമ്മമാർക്കായി കനിവ് പേപ്പർ ഉൽപന്ന യൂണിറ്റും പദ്ധതിയുടെ ഭാഗമായി പ്രവർത്തനം ആരംഭിച്ചു.