ഡോ.ടൈറ്റസ് പി. വർഗീസ്
ചപ്രത്തുകാട്ടില് ദിനേശന് ഇന്നലെ രാത്രി ഉറങ്ങിയത് ഐശ്വര്യ റായിയുടെ കൂടെ!
ചേനംകുഴി പാപ്പി കഴിഞ്ഞാഴ്ച കിടപ്പറ പങ്കിട്ടത് മരിച്ചുപോയ സില്ക്ക് സ്മിതയോടൊപ്പം!
സുശീലാ സുരേന്ദ്രന് (35) ഇക്കഴിഞ്ഞ കുറേ ദിവസങ്ങളായി ഋതിക് റോഷന്റെയൊപ്പമാണത്രേ അന്തിയുറങ്ങുന്നത്.
സംഭവമെന്താന്ന് പറയാതെ പിടികിട്ടിക്കാണുമല്ലോ.
ഇതിന്റെ ശാസ്ത്രീയനാമ(?)മാണ് ‘ഫാന്റസി’!
സംഗതി സിംപിളാണേലും കക്ഷി ചില്ലറക്കാരനല്ല.
പ്രത്യേകിച്ചും നിയമപരമായി സാധുതയുള്ള ബന്ധത്തില്പ്പെട്ട എതിര്ലിംഗത്തില് പെട്ടവരുമായി മാത്രം സംസാരിക്കാനും ഇടപെടാനും അനുവാദമുള്ള കേരളീയ അന്തരീക്ഷത്തില് ഈ ‘ഫാന്റസി’ പലര്ക്കും ഒരാശ്വാസമാണ്!
തോന്നുമ്പോഴൊക്കെ തോന്നിയപോലെ തോന്നിയവരുമായി എന്തു ‘തോന്ന്യാസ’വും കാട്ടാമല്ലോ!
കോടതിയുടെയും നിയമങ്ങളുടെയും അനുവാദം തീര്ത്തും ആവശ്യമില്ലാത്ത ഈ പ്രക്രിയയാണ് ‘ബോറടിച്ച് കുത്തുപാളയെടുത്ത’ പല ദാമ്പത്യങ്ങളുടെയും നട്ടെല്ല്!
‘ദാമ്പത്യ ഫാന്റസി’
ദാമ്പത്യത്തിന്റെ ആദ്യവര്ഷങ്ങള് പിന്നിടുമ്പോള് ‘മടുപ്പ്’ എന്ന വൈറസ് ദമ്പതികളുടെ മനസ്സിലും ശരീരത്തിലും കയറിത്തുടങ്ങുമെന്ന് വിവരമുള്ള വേറേ മനശ്ശാസ്ത്രജ്ഞന്മാര് (ഈയുള്ളവനല്ല) പറയുന്നു!
ഇത്തരം ‘ക്രിട്ടിക്കല് സ്റ്റേജി’ലാണ് മനസ്സില് മറ്റൊരാളെ ധ്യാനിച്ച് സമീപത്തുള്ള ജീവിതപങ്കാളിയുമായി ലൈംഗികതയുടെ അന്തരാള(?)ങ്ങളിലേക്ക് ദമ്പതികള് ഊളിയിടുന്നത്!
കിടപ്പറയില് മാത്രമല്ല അതിനു വെളിയിലും ‘മനോരാജ്യ’ത്തില് ആറാടി സ്വയം സന്തോഷിക്കുന്നവരുണ്ട്. നാട്ടുകാര്ക്ക് ശല്യമില്ലാത്തതുകൊണ്ട് നല്ലതുതന്നെ!
പക്ഷേ, യാഥാര്ത്ഥ്യബോധത്തിനപ്പുറത്ത് 24 മണിക്കൂറും ഫാന്റസി തന്നെയാകുമ്പോള് കൂടെ ജീവിക്കുന്ന ഹതഭാഗ്യന് (ഹതഭാഗ്യ) സംഗതി തിരിച്ചറിയുമെന്നു മാത്രമല്ല,
അടിയും കിട്ടിയേക്കാം!
“കിട്ടാത്ത മുന്തിരി പുളിക്കും” എന്നാണല്ലോ പഴയ നാട്ടുമൊഴി!
പക്ഷേ, സംഗതി ‘സങ്കല്പരതി’യാവുമ്പോ നാട്ടുചൊല്ല് തിരുത്തിയേ പറ്റൂ. ‘കിട്ടാത്ത മുന്തിരിങ്ങ, ലേശംപോലും പുളിക്കില്ല എന്നു മാത്രമല്ല ഒടുക്കത്തെ മധുരവുമാണ്!
കാരണം, ലഭ്യമല്ലാത്ത ‘വിഭവങ്ങളു’ടെ രുചിയാണല്ലോ സങ്കല്പ ചിത്രങ്ങളുടെ അടിത്തറ!
ലൈംഗികതയാണ് ദാമ്പത്യമെന്നു തെറ്റിദ്ധരിച്ചിട്ടുള്ള ദമ്പതികളിലാണ് വിരസതയുടെ ‘ആക്രമണം’ കൂടുതലായി ഉണ്ടാവാറുള്ളത്.
ഡെയ്ലി ചായയും കാപ്പിയും കുടിക്കുന്ന ലാഘവത്തില് സെക്സ് ആസ്വദിച്ചുകൊണ്ടിരുന്ന ദമ്പതികളാവും അവര്.
ഇരുവരുടെയുമോ അഥവാ ഇണകളില് ഒരാളുടെയോ താല്പര്യക്കുറവ് ഇങ്ങനെയുള്ളവരിലാണ് പ്രശ്നമാകുന്നത്.
‘വികാരതരളിതനാ’യ തങ്ങളുടെ പങ്കാളിയെ തൃപ്തിപ്പെടുത്താന് ‘ഫാന്റസി’ എന്ന ലളിതമായ കള്ളത്തരമല്ലാതെ അവര്ക്കു മറ്റു വഴികളില്ലാതെയാകുന്നു. (ഭര്ത്തൃറോള് അലങ്കരി്ക്കുന്ന ‘പുരുഷസിങ്ക’ങ്ങള്ക്കും കുറേയൊക്കെ ഇത് ബാധകമാണ്!)
ഈശ്വരാ…. ഈ ദാമ്പത്യവണ്ടി ഉന്തിത്തള്ളിക്കൊണ്ടുപോകാന് ചില്ലറപ്പാടല്ല.
അവനോ? അതോ അവളോ?
മനോവ്യാപാരത്തിന്റെ മാസ്മരികലോകത്തില് സ്വയമലിഞ്ഞ് മായികപ്രപഞ്ചം സൃഷ്ടിക്കുന്നവരില് സ്ത്രീജനങ്ങളാണ് കൂടുതല് എന്ന് ജ്ഞാനികള് പറയുന്നു.
സങ്കല്പസൃഷ്ടികള് വലതുമസ്തിഷ്കപ്രധാനമാണെന്ന് ആധുനികശാസ്ത്രം കണ്ടെത്തിയതിനെ ഇതുമായി ചേര്ത്തു വായിക്കാവുന്നതാണ്.
പുരുഷവര്ഗ്ഗം പ്രകൃത്യാ ഇടതുതലച്ചോറുമായി ബന്ധപ്പെട്ടവരാണ്. സങ്കല്പസാമ്രാജ്യങ്ങള് പലപ്പോഴും അവരുടെ ‘മാനസികശക്തി’ക്കു മുന്പില് പെട്ടെന്നങ്ങനെ അടിയറവുപറയാറില്ല!
എന്നാലും ‘പെണ്ണുമ്പിള്ളേ പറ്റിക്കാന്’ ചെല കെട്ട്യോന്മാര് ‘കിട്ടാതെപോയ’ പെണ്ണുങ്ങളെയോ, പണ്ടെപ്പൊഴോ ‘കിട്ടിയ’ സ്ത്രീകളെയോ സങ്കല്പിച്ച് രതിയിലേര്പ്പെടാറുണ്ടെന്ന് ഇതേക്കുറിച്ച് കൂലങ്കുഷമായി പഠിച്ച (കര്ത്താവേ, ഇവന്മാര്ക്കൊന്നും വേറേ യാതൊരു പണിയുമില്ലേ?) മനശ്ശാസ്ത്രവിദഗ്ദ്ധര് പറയുന്നു.
ദേയ്…. കാര്യമറിയുന്നേന് മുന്പ് കുറ്റം പറയരുത്! ഈ ആണ്പുലികള് ഇതൊന്നും മനപ്പൂര്വ്വം ചെയ്യുന്നതല്ല;
ഉദ്ധാരണം നഷ്ടപ്പെട്ട് കൊതിയും പരഗതിയുമില്ലാതെ ചക്രശ്വാസം വലിക്കുമ്പോ മുട്ടുശാന്തിക്ക് ‘കൊള്ളാവുന്ന വേറേ ഒരെണ്ണത്തിനെ’ ചുമ്മാ സങ്കല്പിച്ചുപോകുന്നതാണ്. പാവങ്ങള്….
പെണ്പങ്കാളിയുടെ കാര്യവും ഏതാണ്ട് ഇതേപോലൊക്കെത്തന്നെ!
കള്ളിന്റെ നാറ്റവും കുളിക്കാത്ത ശരീരത്തിന്റെ ഒടുക്കത്തെ വാടയുമായി ഭര്ത്താവെന്ന കടുവ ലൈംഗികമായി ‘അറ്റാക്ക്’ ചെയ്യുമ്പോ, വിധേയവിനീത ദാസിയായി കിടന്നുകൊടുക്കേണ്ടിവരുന്ന പാവം ഭാര്യ,
മദ്യഗന്ധമില്ലാത്ത കുളിയും നനേമൊള്ള കൊള്ളാവുന്നൊരു സുന്ദരക്കുട്ടപ്പനെ സ്വപ്നം കണ്ടാല് പഴിപറയാനാകുമോ?
ലാസ്റ്റ് കുറിപ്പ്
ഫാന്റസി സ്ഥിരം പരിപാടിയാക്കിയാല് നിങ്ങടെ ദാമ്പത്യം നശിച്ചു നാറ്റക്കേസാകും.
പക്ഷേ, സംഗതി ഒരഡ്ജസ്റ്റുമെന്റിലങ്ങു പോവുകയാണെങ്കില് ദാമ്പത്യജീവിതം വിജയകരം!
ഓ. കെ. ഇനി ട്രൈചെയ്തോളൂ! ആശംസകള്! (ഇമ്മാതിരി തലതിരിഞ്ഞ ഉപദേശങ്ങള്ക്ക് അവസാനമായി ഒരു മെഗാ മാപ്പ്!)