സുരക്ഷാ പ്രശ്‌നങ്ങൾ ചൂണ്ടിക്കാട്ടി കാസ്പെർസ്കി ആൻ്റിവൈറസ് സോഫ്‌റ്റ്‌വെയർ രാജ്യത്ത് വിൽക്കുന്നത് നിരോധിച്ചതായി യുഎസ് സർക്കാർ പ്രഖ്യാപിച്ചു. തൊട്ടുപിന്നാലെ ഇത് അമേരിക്കൻ ഉൽപ്പന്നങ്ങളുമായുള്ള വിദേശ മത്സരം തടയാനുള്ള വാഷിംഗ്ടണിൻ്റെ ഒരു സാധാരണ നീക്കമാണ് ഈ തീരുമാനമെന്ന് റഷ്യ പറഞ്ഞു.
കാസ്പെർസ്കി അന്താരാഷ്ട്ര വിപണിയിൽ വളരെ മത്സരാധിഷ്ഠിത കമ്പനിയാണെന്നും അതിൻ്റെ വിൽപ്പന നിയന്ത്രിക്കാനുള്ള യുഎസ് തീരുമാനം ന്യായീകരിക്കാൻ പറ്റാത്ത ഒരു മത്സരനയമാണെന്ന് ക്രെംലിൻ വക്താവ് ദിമിത്രി പെസ്കോവ് പറഞ്ഞു.
1997 ൽ പ്രവർത്തനം ആരംഭിച്ച റഷ്യ ആസ്ഥാനമായുള്ള കമ്പനിയാണ് കാസ്പെർസ്കി. തങ്ങളുടെ പ്രവർത്തനങ്ങൾ സംരക്ഷിക്കാൻ നിയമപരമായ വഴികൾ തേടുമെന്ന് കമ്പനി അറിയിച്ചു.
യുഎസ് തീരുമാനം കാസ്പെർസ്കിയുടെ ഉൽപ്പന്നങ്ങളുടെയും സേവനങ്ങളുടെയും സമഗ്രതയെക്കുറിച്ചുള്ള സമഗ്രമായ വിലയിരുത്തലിൻ്റെ അടിസ്ഥാനത്തിൽ അല്ല എന്ന് കാസ്പെർസ്കി വിശ്വസിക്കുന്നു. ഇത് സ്വകാര്യകമ്പനി ആണെന്നും റഷ്യൻ സർക്കാരുമായി യാതൊരു ബന്ധവുമില്ലെന്നും കമ്പനി കൂട്ടിച്ചേർത്തു.
“അമേരിക്കക്കാരുടെ സ്വകാര്യ വിവരങ്ങൾ ശേഖരിക്കാനും ആയുധമാക്കാനും കാസ്പെർസ്കി പോലുള്ള റഷ്യൻ കമ്പനികളെ ചൂഷണം ചെയ്യാനുള്ള ഉദ്ദേശവും റഷ്യ കാണിക്കുന്നു. അതുകൊണ്ടാണ് ഞങ്ങൾ ഇന്ന് ഈ നടപടിയെടുക്കാൻ നിർബന്ധിതരായത്,” യുഎസ് വാണിജ്യ സെക്രട്ടറി ജിന റൈമോണ്ടോ പറഞ്ഞു.
നിരോധനം അടുത്ത മാസം പ്രാബല്യത്തിൽ വരും കൂടാതെ റഷ്യൻ കമ്പനിയുടെ മൂന്ന് യൂണിറ്റുകൾ ഒരു വ്യാപാര നിയന്ത്രണ പട്ടികയിൽ ചേർക്കും.
അതായത് ജൂലൈ 20 മുതൽ വ്യക്തിഗത ഉപഭോക്താക്കൾക്കും ബിസിനസുകൾക്കും ഉൽപ്പന്നങ്ങൾ വിൽക്കുന്നതിൽ നിന്ന് കസ്പർസ്കി വിലക്കപ്പെടും.
കാസ്പെർസ്കിയുടെ ആൻ്റിവൈറസ് ഉപയോഗിക്കുന്ന ഉപഭോക്താക്കൾ നിയമം ലംഘിക്കുന്നില്ലെന്നും സെപ്‌റ്റംബർ 29 വരെ അവർക്ക് സോഫ്‌റ്റ്‌വെയർ സുരക്ഷാ അപ്‌ഡേറ്റുകൾ ലഭിക്കുമെന്നും റൈമോണ്ടോ പറഞ്ഞു.