ചൈനയിലെ ഹുനാൻ പ്രവിശ്യയിലെ പ്രകൃതിദത്തമായ ഒരു വിസ്മയമാണ് ഗാവോക്കി ലിംഗ്. വളരെ മിനുസമേറിയ ഒട്ടും തന്നെ ഘർഷണമില്ലാത്ത പാറകൾ നിറഞ്ഞ ഒരു പർവ്വതമാണിത്. അപകടസാധ്യത ഏറെ ഉണ്ടായിട്ടും ആളുകൾ ഇവിടം സന്ദർശിക്കാൻ ഇഷ്ടപ്പെടുന്നു.
ചെങ്കുത്തായ പാറക്കെട്ടുകളാണിവ. നിരന്തരമായ കാറ്റും മഴയും മൂലമാണ് പാറക്കെട്ടിൻ്റെ പ്രതലം വളരെ മിനുസമേറിയതായത്. വീതിയുള്ള കത്തിയുടെ നീളമുള്ള അറ്റവുമായി (നൈഫിൻ്റെ എഡ്ജുമായി) ഇതിനെ ഉപമിക്കാറുണ്ട്. പാറക്കെട്ടിലെ മിനുസമേറിയ ഭാഗത്തു കൂടി സഞ്ചരിക്കുന്നത് അപകടകരമാണെങ്കിലും ഇവിടത്തെ സഞ്ചാരം ഭാഗ്യം കൊണ്ടു വരുമെന്നൊരു വിശ്വാസം നിലവിലുള്ളതു കൊണ്ട് പലരും സാഹസത്തിന് ഒരുമ്പെടുന്നു. ഇവിടെ പിടിച്ചു നടക്കാൻ കയറോ കമ്പിയോ ഇല്ല.
യാഥാർത്ഥ്യത്തിലെ പേടിസ്വപ്നമാണീ സഞ്ചാരം. ഇതു വഴി നടക്കുമ്പോൾ മഴ പെയ്താൽ പിന്നത്തെ കാര്യം പറയുകയേ വേണ്ട. തെന്നി വീഴാനുള്ള സാധ്യത കൂടും.
ദൂരെ നിന്നും കാണാൻ വളരെ മനോഹരമാണ് ഈ പാറക്കെട്ടുകൾ. അപകടം ഒളിഞ്ഞു കിടക്കുന്ന പർവ്വതനിരയാണിത്. ടൂറിസ്റ്റുകാർ ഇവിടെ സഞ്ചരിക്കാൻ ഇഷ്ടപ്പെടുന്നു. ചൈനയിലെ ഡാൻസിയാ പാർക്കിലാണ് റെയിൻബോ മൌണ്ടനും ഗാവോക്കി ലിംഗും സ്ഥിതി ചെയ്യുന്നത്.