കാലിഫോർണിയയിലെ മൃഗശാലയാണ് സാൻ ഡീഗോ. അമേരിക്കയിൽ ഏറ്റവും കൂടുതൽ ആളുകൾ സന്ദർശിക്കുന്ന മൃഗശാലയാണിത്. 100 ഏക്കറോളം വിസ്തൃതിയുണ്ട്. ഇവിടെ വംശനാശഭീഷണി നേരിടുന്ന 3700-ഓളം മൃഗങ്ങളുണ്ട്.
ടെയ്പ്പീർ (Tapir) എന്ന മൃഗവും വംശനാശഭീഷണി നേരിടുന്നവയുടെ പട്ടികയിലുണ്ട്. ഇവിടെ ബൈർഡ് ടെയ്പ്പീർ എന്ന ഇനം ടെയ്പ്പീർ ഒരു കുഞ്ഞിന് ജന്മം നൽകിയതാണ് ഇവിടത്തെ പുതിയ വാർത്ത. അമ്മ ടെയ്പ്പീറിന്റെ പേര് ലൂണ.
മൃഗശാല പുറത്തുവിട്ട വീഡിയോയിൽ ജനിച്ച പെൺ ടെയ്പ്പീറിനെയും അമ്മ ടെയ്പ്പീറിനെയും കാണാം. ജൂൺ 3-നായിരുന്നു ടെയ്പ്പീറിന്റെ ജനനം. ടെയ്പ്പീർ കുഞ്ഞിന് പേരിട്ടിട്ടില്ല. ആനകളുടെ താവളത്തിലാണ് ടെയ്പ്പീർ കുഞ്ഞ് ഇപ്പോൾ ഓടിക്കളിക്കുന്നത്. കുഞ്ഞു ടെയ്പ്പീറിന്റെ ശരീരത്തിൽ ബ്രൌൺനിറത്തിൽ വരകളുണ്ട്. അമ്മ ടെയ്പ്പീറിന് കറുത്ത നിറമാണ്. കുഞ്ഞിൻ്റെ നിറവും ക്രമേണ അമ്മയുടെ നിറമായി മാറും.
പൊതുവെ ടെയ്പ്പീർ കുഞ്ഞുങ്ങള് നടക്കുന്നതു കണ്ടാല് തണ്ണീര്മത്തന് ഉരുണ്ടുനടക്കുന്നതു പോലെ തോന്നും. തടിച്ച ശരീരവും ചെറിയ വാലും തലയോട്ടിയിലേക്ക് കുഴിഞ്ഞിരിക്കുന്ന കണ്ണുകളും ടെയ്പ്പീറുകളുടെ പ്രത്യേകതകളാണ്. ടെയ്പ്പീറിന്റെ മൂക്കും മേല്ച്ചുണ്ടും ചേര്ന്ന് കണ്ടാല് തുമ്പിക്കൈ പോലെ തോന്നിക്കും. ഒരു ദിവസം ടെയ്പ്പീറുകൾക്ക് ഏതാണ്ട് 35 കിലോഗ്രാം ആഹാരം ആവശ്യമുണ്ട്.
35 ദശലക്ഷം വർഷങ്ങൾക്ക് മുമ്പുള്ള അസ്ഥികളുടെ ഘടനയോട് സാമ്യമുള്ള ചുരുക്കം ചില ജീവികളിൽ ഒന്നാണ് ടെയ്പ്പീറുകൾ. പഴയ കാല ടെയ്പ്പീറുകളോടുള്ള സമാനത കാരണം ടെയ്പ്പീറുകളെ ജീവനുള്ള ഫോസിൽ എന്നു വിളിക്കുന്നു.