സ്പെയിനിലെ ബാഴ്‌സലോണയിലാണ് ഡൊമിംഗ്യൂസും കുടുംബവും താമസിക്കുന്നത്. ഡൊമിംഗ്യൂസിൻ്റെ മകനായ 11 വയസ്സുള്ള പോൾ ഡൊമിംഗ്യൂസിന് ഉപ്പോൾ സ്കൂൾ വേനൽക്കാല അവധിക്കാലമാണ്. എന്നാൽ തൻ്റെ പ്രായത്തിലുള്ള മിക്ക കുട്ടികളിൽ നിന്നും വ്യത്യസ്തമായി അവന് പുറത്തേക്ക് പോകാൻ കഴിയില്ല.
പോൾ ഡൊമിംഗ്യൂസിന് സെറോഡെർമ പിഗ്മെൻ്റോസം (എക്സ്പി) എന്ന അപൂർവ രോഗമുണ്ട്, ഇത് ചർമ്മത്തെയും കണ്ണിനെയും ബാധിക്കുന്നു. സൂര്യൻ്റെ അൾട്രാവയലറ്റ് വികിരണം ഏൽക്കാൻ പാടില്ല. സൂര്യപ്രകാശത്തിൽ അൽപ്പനേരം നിന്നാൽ പോലും ഗുരുതരമായ പൊള്ളലുണ്ടാകും. പടിഞ്ഞാറൻ യൂറോപ്പിൽ ഈ അസുഖം ബാധിച്ച ഓരോ ദശലക്ഷത്തിനും 2.3 രോഗികൾ വീതമുണ്ട്. സ്പെയിനിൽ 100-ഓളം ആളുകൾക്ക് സെറോഡെർമ പിഗ്മെൻ്റോസം ഉണ്ട്.
ശൈത്യകാലത്ത് പോലും പുറത്തിറങ്ങുന്നതിന് മുമ്പ് പോൾ ഡൊമിംഗ്യൂസ് ജാക്കറ്റ്, സൺഗ്ലാസ്, കയ്യുറകൾ എന്നിവ ധരിക്കുന്നു. വേനൽക്കാലത്ത് അവൻ കഴിയുന്നതും വീടിനുള്ളിൽ തന്നെ കഴിയും. സൂര്യൻ അസ്തമിച്ചു കഴിഞ്ഞാൽ പോൾ ഡൊമിംഗ്യൂസിന് ബീച്ചിലേക്ക് പോകാം. പുറത്ത് ഒരു ഐസ്‌ക്രീം കഴിക്കാം. അപ്പോൾ മാത്രമാണ് അവൻ്റെ മുഖത്ത് സന്തോഷത്തിൻ്റെ പുഞ്ചിരി വരുന്നത്. കാലാവസ്ഥാ വ്യതിയാനം മൂലമുണ്ടാകുന്ന ഉഷ്ണതരംഗങ്ങൾ ഇടയ്ക്കിടെ തീവ്രമായി മാറുന്നതിനാൽ പോളിനും അവനെ പോലെയുള്ള മറ്റുള്ളവർക്കും അപകടസാധ്യതകൾ വർദ്ധിക്കുന്നു.