ബംഗളൂരുവിലെ കൊതുകുകൾ ഇപ്പോൾ കീടനാശിനിയെയും പ്രതിരോധിക്കുന്നു. ടാറ്റാ ഇൻസ്റ്റിറ്റ്യൂട്ട് ഫോർ ജനിറ്റിക്സ് ആൻഡ് സൊസൈറ്റി നടത്തിയൊരു പഠനത്തിൽ കണ്ടെത്തിയതാണിത്. ബംഗളൂരുകാരുടെ ഉറക്കം കെടുത്തുന്നവരാണ് കൊതുകുകൾ. നഗരത്തിലെ കൊതുകുകൾ കൂടുതൽ സ്മാർട്ട് ആയി എന്നാണ് പഠനം വെളിപ്പെടുത്തുന്നത്.
ഇവിടുത്തെ കൊതുകുകളുടെ ശരീരത്തിൽ ഒരു പുതിയ തരം എൻസൈമുകൾ രൂപപ്പെട്ടിരിക്കുന്നുവത്രേ. ഈ രാസവസ്തുക്കൾക്ക് കീടനാശിനികളെ പ്രതിരോധിക്കാനുള്ള ശക്തിയുണ്ട്. കീടനാശിനികളെ നിർവീര്യമാക്കി അതിനെ അതിജീവിക്കാൻ കൊതുകുകൾക്ക് കഴിയുന്നു.
ഇത്തരത്തിൽ ഒരു ശരീരഘടനാ മാറ്റം കൊതുകുകൾക്ക് സംഭവിച്ചിരിക്കുന്നു എന്നാണ് പഠനം കാണിക്കുന്നത്. മനുഷ്യൻ്റെ ചില പെരുമാറ്റങ്ങൾ മനസ്സിലാക്കിയാണ് കൊതുകുകൾ പ്രവർത്തിക്കുന്നത് എന്നത് മറ്റൊരു കാര്യം. റിപ്പല്ലൻ്റുകളെയും കൊതുക് നെറ്റ് കർട്ടനുകളെയും ഇപ്പോൾ ബംഗളൂരു കൊതുകുകൾക്ക് തിരിച്ചറിയാൻ കഴിയും.
പകൽ സമയത്ത് തന്നെ വീടിനുള്ളിൽ കടന്നു കൂടുകയാണ് അവരുടെ സൂത്രം. റിപ്പല്ലൻ്റുകൾ ഓഫ് ആക്കി 8-9 മണിക്കൂറുകൾക്കു ശേഷം മാത്രം അവ വീടിൻ്റെ ഉള്ളിലേക്ക് കയറും. കൊതുകുകളുടെ ഈയൊരു ജനിതക മാറ്റം മൂലം കൊതുക് നെറ്റുകളും റിപ്പല്ലൻ്റുകളും ഫലപ്രദമാകില്ല.
കൊതുകുകളുടെ സൂത്രം മനസ്സിലാക്കി പ്രവർത്തിക്കുക മാത്രമാണ് കൊതുക് കടിയിൽ നിന്നും രക്ഷപ്പെടാനുള്ള ഒരേയൊരു മാർഗം. ലാർവകളെ തിന്നുന്ന മീൻ വളർത്തുക, പ്രകൃതിദത്തമായ കൊതുകു നിവാരണ മാർഗ്ഗങ്ങൾ ഉപയോഗിക്കുക തുടങ്ങിയവയിലൂടെ മാത്രമേ ഇനി കൊതുക് കടിയിൽ നിന്നും രക്ഷപ്പെടാൻ പറ്റുകയുള്ളൂ.