ഇന്ത്യയിലുള്ളവർക്ക് അത് ഉത്തരേന്ത്യൻ ആയാലും ദക്ഷിണേന്ത്യൻ ആയാലും വീട്ടിലെ ആഹാരം കഴിക്കാൻ പ്രത്യേക താല്പര്യം തന്നെയാണ്. ഓഫീസ് ജോലിത്തിരക്ക് കാരണം സ്ത്രീകൾക്ക് പലപ്പോഴും വീട്ടിൽ പാകം ചെയ്യാൻ സാധിക്കാതെ വരുമ്പോൾ ആശ്രയം പുറത്തെ ഭക്ഷണം തന്നെ. മറ്റൊരു രാജ്യത്ത് ആയാലോ? ഇന്ത്യൻ അല്ലെങ്കിൽ മലയാളി ഭക്ഷണം കിട്ടാൻ നമ്മൾ കൊതിക്കും.
ലണ്ടൻ നഗരത്തിൽ ഇന്ത്യയിൽ നിന്നുള്ള വനിത തൻ്റെ സുഹൃത്തുമായി ചേർന്ന് ഡബ്ബാ ഡ്രോപ്പ് തുടങ്ങിയിരിക്കുന്നു. മുംബൈയിലെ ഡബ്ബാവാലയിൽ നിന്നും പ്രചോദനം ഉൾക്കൊണ്ടാണ് ഈ സംരംഭം ആരംഭിച്ചത്. 1890-ൽ തുടങ്ങിയ ഡബ്ബ വാലയിലെ ജോലിക്കാർ വീടുകളിൽ നിന്നും ടിഫിൻ ബോക്സ് ശേഖരിച്ച് ഓരോ ഓഫീസിലും എത്തിക്കും. ഡബ്ബ ഡ്രോപ്പിലും ഫ്രഷ് ആഹാരത്തിനും വീട്ടിലെ രുചിക്കും തന്നെ മുൻ തൂക്കം.
2018 ലാണ് ലണ്ടനിൽ അൻഷു അഹൂജയും റെനി വില്യംസും ചേർന്ന് ഡബ്ബ ഡ്രോപ്പ് തുടങ്ങിയത്. ഈ രണ്ട് അമ്മമാരും അനീഷുവിൻ്റെ അടുക്കളയിലാണ് ഭക്ഷണം പാകം ചെയ്തത്. അൻഷു മുംബൈ സ്വദേശിയാണ്. റസ്റ്റോറൻ്റ് ഫുഡ് വീട്ടിലെ രുചിയോടെ ഉണ്ടാക്കുന്നത് അൻഷുവിന് ഒരു പാഷനാണ്.
ലണ്ടനിൽ ടിവി പ്രൊഡ്യൂസർ ആയി ജോലി ചെയ്യുമ്പോൾ പല ഫുഡ് ഡെലിവറികളിലും എണ്ണ കൂടുതൽ ഉപയോഗിക്കുന്നതും പാക്കിങ്ങിന് പ്ലാസ്റ്റിക് ഉപയോഗിക്കുന്നതും അൻഷു ശ്രദ്ധിച്ചിട്ടുണ്ടായിരുന്നു. ദക്ഷിണേന്ത്യൻ വിഭവങ്ങളാണ് അനുഷു ആദ്യം പാകം ചെയ്തു തുടങ്ങിയത്. 20 പേർക്കുള്ള ഭക്ഷണം ഉണ്ടാക്കി ഇക്കോ ഫ്രണ്ട്‌ലി പാക്കിംഗ് അതായത് ടിഫിൻ ബോക്സിൽ നൽകി തുടങ്ങി. പരിസ്ഥിതി സൗഹൃദത്തിനായി സൈക്കിളിൽ തന്നെയാണ് ഡെലിവറി നടത്തുന്നത്.
ഇന്ത്യൻ, ജപ്പാനീസ്, വിയറ്റ്നാം റെസിപ്പികളും ഇപ്പോൾ നൽകുന്നുണ്ട്. പോഷകം നഷ്ടപ്പെടാതെയാണ് പാകം ചെയ്യുന്നത്. അനുഷുവിൻ്റെ ആഹാരം എല്ലാവർക്കും ഇഷ്ടപ്പെട്ടു കഴിഞ്ഞു. ആവശ്യക്കാർ കൂടിവരികയാണ്.