രാജസ്ഥാനിൽ ഒരു ഗ്രാമീണ സ്‌കൂൾ അധ്യാപകൻ്റെ യാത്രയയപ്പ് ചടങ്ങ് വാർത്തകളിൽ നിറഞ്ഞു. അദ്ദേഹത്തിൻ്റെ വിദ്യാർത്ഥികൾ അദ്ദേഹത്തിന് അതുല്യമായ യാത്രയയപ്പ് നൽകി എന്ന് മാത്രമല്ല സംസ്ഥാന വിദ്യാഭ്യാസ മന്ത്രി മദൻ ദിലാവർ 250 കിലോമീറ്റർ നടന്ന് അദ്ദേഹത്തിൻ്റെ പാദങ്ങൾ തൊട്ട് അനുഗ്രഹം വാങ്ങാനെത്തി.
അധ്യാപകൻ്റെ മികച്ച സേവനങ്ങളെ പ്രശംസിക്കുക മാത്രമല്ല കലിയുഗത്തിൽ അധ്യാപകൻ്റെ ബഹുമാനം വർദ്ധിപ്പിച്ച അദ്ദേഹത്തിൻ്റെ കഴിവുള്ള വിദ്യാർത്ഥികളെ വിദ്യാഭ്യാസ മന്ത്രി അഭിവാദ്യം ചെയ്യുകയും ചെയ്തു. ഫിസിക്കൽ എഡ്യൂക്കേഷൻ അധ്യാപകൻ ഹനുമാൻ റാം ദേവദയാണ് സർക്കാർ സർവീസിൽ നിന്ന് വിരമിക്കുന്ന വാർത്തകളിൽ ഇടം പിടിച്ചത്. കഴിഞ്ഞ 29 വർഷമായി നാഗൗർ ജില്ലയിലെ ഗോഗേലാവ് ഗ്രാമത്തിലെ സേത് മേഘ്‌രാജ് മനക്ചന്ദ് ബോത്ര സർക്കാർ ഹയർ സെക്കൻഡറി സ്കൂളിൽ തുടർച്ചയായി സേവനമനുഷ്ഠിച്ച അദ്ദേഹം വിരമിച്ചപ്പോൾ ഗ്രാമം മുഴുവൻ വികാരഭരിതമായി.
ഗോഗേലാവ് ഗ്രാമത്തിലെ സ്കൂളിൽ ഹനുമാൻ സിംഗ് ദേവ്ദ 29 വർഷമായി സേവനമനുഷ്ഠിക്കുന്നു. അദ്ദേഹം പഠിപ്പിച്ച 65 വിദ്യാർത്ഥികൾ ഇന്ന് ആർമിയിലാണ്. 20 പേർ പോലീസിലാണ്. അതിലൊരാൾ എസ് ഐ ആണ്. വിദ്യാർത്ഥികൾ പതിനഞ്ചോളം പേർ ഫിസിക്കൽ എഡ്യൂക്കേഷൻ അധ്യാപകരായി. ദേശീയ അന്തർദേശീയ തലത്തിലുള്ള കളിക്കാരായി മാറിയ 18-ലധികം വിദ്യാർത്ഥികൾ ഉണ്ട്. നൂറുകണക്കിന് പേർ സർക്കാർ സർവീസിൽ സേവനമനുഷ്ഠിക്കുന്നു.
അതുകൊണ്ടാണ് വിദ്യാർത്ഥികളായ അർജുനന്മാരെല്ലാം കൂടി തങ്ങളുടെ ഗുരുവായ ദ്രോണാചാര്യർക്ക് ഇത്രയും മികച്ച യാത്രയയപ്പ് ഏർപ്പെടുത്തിയത്. ഈ ശിഷ്യന്മാർ ആദ്യം അലുംനി കൗൺസിൽ എന്ന പേരിൽ ഒരു വാട്ട്‌സ്ആപ്പ് ഗ്രൂപ്പ് ഉണ്ടാക്കി. തുടർന്ന് എല്ലാ ശിഷ്യന്മാരും അവരുടെ സർക്കാർ സേവനങ്ങളിൽ നിന്ന് അവധിയെടുത്ത് ഗോഗെലാവ് ഗ്രാമത്തിലെത്തി.
ഒരാഴ്ചയായി വിവിധ കായിക മത്സരങ്ങൾ, രക്തദാനം, വൃക്ഷത്തൈ നടീൽ തുടങ്ങിയ പരിപാടികളെല്ലാം സംഘടിപ്പിച്ചു. ജൂലായ് 31ന് ഗുരുവിന് വികാരനിർഭരമായ യാത്രയയപ്പ് നൽകി. 10 ലക്ഷം രൂപയുടെ ആഡംബര കാറും സമ്മാനമായി നൽകി. ഫിസിക്കൽ എജ്യുക്കേഷൻ അധ്യാപകർക്ക് അദ്ദേഹത്തിൻ്റെ വിദ്യാർത്ഥികൾ ഇത്തരമൊരു യാത്രയയപ്പ് നൽകുന്നത് ജീവിതത്തിൽ ആദ്യമായാണ് താൻ കാണുന്നത് എന്ന് രാജസ്ഥാൻ വിദ്യാഭ്യാസ മന്ത്രി മദൻ ദിലാവർ പറഞ്ഞു.
വിദ്യാർത്ഥികളോടുള്ള പി.ടി.ഐ ഹനുമാൻ സിംഗ് ദേവ്ദയുടെ ത്യാഗവും തപസ്സും സമർപ്പണവുമാണ് ഇതിന് പിന്നിൽ. ഒരു ഗുരു തൻ്റെ വിദ്യാർത്ഥികളെ എങ്ങനെ കഴിവുള്ളവരാക്കി എന്ന് അദ്ദേഹം കാണിച്ചുതന്നു. ആ വിദ്യാർത്ഥികളും മഹത്തായ സമർപ്പണം കാണിക്കുകയും അവരുടെ ഗുരുവിനോടുള്ള ബഹുമാനം പ്രകടിപ്പിക്കുകയും ചെയ്തു.
ഹനുമാൻ സിംഗ് ദേവ്ദ തൻ്റെ പദവി ഒരു സർക്കാർ ജോലിയായി കണക്കാക്കാതെ നൂറുകണക്കിന് ശിഷ്യന്മാരെ രാജ്യസേവനത്തിന് സജ്ജമാക്കി ഹൃദയം കീഴടക്കിയെന്ന് വിദ്യാഭ്യാസ മന്ത്രി പറഞ്ഞു. മുഖ്യമന്ത്രി ഭജൻലാൽ ശർമ്മ ഏതാനും മാസങ്ങൾക്കുമുമ്പ് ഗോഗെലവ് ഗ്രാമത്തിലെത്തി ഹനുമാൻ സിംഗ് ദേവ്ദയെ കാണുകയും അദ്ദേഹത്തിൻ്റെ സമർപ്പണത്തെ പ്രശംസിക്കുകയും ചെയ്തിരുന്നു.