വ്യാവസായിക വിപ്ലവത്തോടെ ലോകത്ത് ഒരു വലിയ മാറ്റം സംഭവിച്ചു. ലോക ജനസംഖ്യ ഏകദേശം എ ഡി 1800-ൽ ഒരു ബില്യണിലെത്തിയിരുന്നു. രണ്ടാമത്തെ ബില്യണിലേക്ക് പിന്നീട് 130 വർഷത്തിനുള്ളിൽ അതായത് 1930-ലും 30 വർഷത്തിനുള്ളിൽ മൂന്നാമത്തെ ബില്യണിലേക്ക് അതായത് 1960-ലും എത്തി. തുടർന്ന് 15 വർഷത്തിനുള്ളിൽ നാലാമത്തെ ബില്യണിലേക്കും അതായത് 1974-ൽ, വീണ്ടും അടുത്ത 13 വർഷത്തിനുള്ളിൽ അഞ്ചാമത്തെ ബില്യണിലും അതായത് 1987-ൽ.
ലോക ജനസംഖ്യാ ദിനാചരണം ആരംഭിച്ചത് ചരിത്രത്തിലെ ഒരു സുപ്രധാന നിമിഷത്തിൽ നിന്നാണ്. 1987 ജൂലൈ 11-ന് ലോകജനസംഖ്യ 5 ബില്ല്യൺ എന്ന അഭൂതപൂർവമായ നാഴികക്കല്ലിൽ എത്തിയിരുന്നു. ഇക്കാര്യം ലോകബാങ്കിലെ മുതിർന്ന ജനസംഖ്യാ ശാസ്ത്രജ്ഞനായ ഡോ. കെ.സി.സക്കറിയയുടെ ശ്രദ്ധയിൽപ്പെട്ടു. അദ്ദേഹമാണ് വർഷം തോറും ഈ ദിനം ഓർമ്മിക്കുവാനുള്ള ആശയം മുന്നോട്ടുവച്ചത്.
ജനസംഖ്യയുമായി ബന്ധപ്പെട്ട വെല്ലുവിളികളെ അഭിമുഖീകരിക്കേണ്ടതിൻ്റെ പ്രാധാന്യം തിരിച്ചറിഞ്ഞ ഐക്യരാഷ്ട്രസഭ ഈ നിർദ്ദേശം സ്വീകരിച്ചു. 1989-ൽ ഔദ്യോഗികമായി ലോക ജനസംഖ്യാ ദിനം നിലവിൽ വരികയും ചെയ്തു.
തുടക്കം മുതൽ ലോക ജനസംഖ്യാ ദിനം വിദ്യാഭ്യാസത്തിനായി ആഹ്വാനം ചെയ്തു. പ്രത്യുൽപാദന ആരോഗ്യം, കുടുംബാസൂത്രണം, ലിംഗസമത്വം, സുസ്ഥിര വികസനം തുടങ്ങിയ പല നിർണായക വിഷയങ്ങളിലേക്കും ലോക ശ്രദ്ധ ആകർഷിച്ചിട്ടുണ്ട്.
2024-ലെ ലോക ജനസംഖ്യാ ദിനത്തിൻ്റെ തീം, “ആരെയും പിന്നിലാക്കരുത്, എല്ലാവരെയും എണ്ണുക” എന്നതാണ്.
യുഎൻ സെക്രട്ടറി ജനറൽ അൻ്റോണിയോ ഗുട്ടെറസ് ഈ വിഷയത്തെക്കുറിച്ചുള്ള തൻ്റെ പ്രസ്താവനയിൽ ജനസംഖ്യാ വെല്ലുവിളികളെ അഭിമുഖീകരിക്കുന്നതിൽ ഡാറ്റയുടെ നിർണായക പങ്ക് എടുത്തുപറഞ്ഞു. കൃത്യമായതും ഉൾക്കൊള്ളുന്നതുമായ ഡാറ്റയാണ് ഫലപ്രദമായ നയങ്ങളും പരിപാടികളും നിർമ്മിക്കുന്ന അടിസ്ഥാനമെന്ന് ഗുട്ടെറസ് ഊന്നിപ്പറഞ്ഞു.
ലോകജനസംഖ്യ ഇന്ന് ഈ ദിനത്തിൽ എത്രയാണെന്നു കൂടി പറയാം. ലോകജനസംഖ്യ 8,121,112,300 കടന്നിരിക്കുന്നു. ഏറ്റവും മുൻപന്തിയിൽ നമ്മുടെ ഇന്ത്യയാണ്. ഇന്ത്യയിലെ ഇന്നത്തെ ജനസംഖ്യ 1,442,118,900 ആണ്. രണ്ടാം സ്ഥാനം ചൈനയ്ക്ക്. അവിടെ ജനസംഖ്യ 1,425,163,800 കടന്നു.
മൂന്നാം സ്ഥാനത്ത് യുഎസ്എ. ജനസംഖ്യ 341,869,700.
ഐക്യരാഷ്ട്രസഭയുടെ കണക്കനുസരിച്ച് 2022 നവംബർ 15-നാണ് ലോകജനസംഖ്യ 8 ബില്യണിലെത്തിയത്.
പ്രാദേശിക, ദേശീയ, അന്തർദേശീയ തലങ്ങളിൽ നയങ്ങൾ രൂപപ്പെടുത്തുന്നതിലും പൊതുജനാഭിപ്രായത്തെ സ്വാധീനിക്കുന്നതിലും പ്രവർത്തനങ്ങളെ നയിക്കുന്നതിലും ഈ ദിനാചരണം നിർണായക പങ്ക് വഹിച്ചിട്ടുണ്ട്.
ജനസംഖ്യയുമായി ബന്ധപ്പെട്ട വെല്ലുവിളികളെയും അവസരങ്ങളെയും കുറിച്ച് ചർച്ചകളിൽ ഏർപ്പെടാൻ സർക്കാരുകൾക്കും സ്ഥാപനങ്ങൾക്കും വ്യക്തികൾക്കും ലോക ജനസംഖ്യാ ദിനം ഒരു അവസരം നൽകുന്നു.