പ്രശസ്തിയും വ്യൂസും കിട്ടാൻ യൂട്യൂബർ മൊബൈൽ ടവറിൽ കയറാനും ധൈര്യം കാട്ടി. പക്ഷെ തിരിച്ചിറങ്ങാൻ കഴിയാതെ 5 മണിക്കൂർ ടവറിൽ പെട്ടുപോയി. സംഭവം നടന്നത് ഉത്തർപ്രദേശിലെ ഗ്രേറ്റർ നോയിഡയിലാണ്. നീലേശ്വർ എന്നു പേരുള്ള യൂട്യൂബർ Nileshwar22 എന്ന ചാനൽ നടത്തുന്നു.
ഗ്രേറ്റർ നോയിഡയിലെ തിഗ്രി ഗ്രാമത്തിലെ മൊബൈൽ ടവറിലാണ് സാഹസംരംഗം പകർത്തി വ്യൂസ് കൂട്ടാൻ യൂട്യൂബർ തുനിഞ്ഞത്. 887000 സബ്സ്ക്രൈബർമാർ ഇപ്പോഴുണ്ട്. അതൊന്നു കൂട്ടാനുള്ള സൂത്രവിദ്യയായിരുന്നു.
കൂട്ടുകാരൻ താഴെ നിന്ന് ക്യാമറയിൽ ചിത്രീകരിക്കുകയായിരുന്നു. ആളുകൾ ശ്രദ്ധിച്ചു തുടങ്ങുകയും ആളു കൂടുകയും ചെയ്തപ്പോൾ കൂട്ടുകാരൻ തടിതപ്പി. നീലേശ്വർ ടവറിൽ പെട്ടുപോയി.
പോലീസ് എത്തി. 5 മണിക്കൂറെടുത്തു നീലേശ്വറിനെ താഴെയെത്തിക്കാൻ. സമൂഹമാധ്യമങ്ങളിൽ പ്രശസ്തിക്ക് വേണ്ടി ഇത്തരം കാര്യങ്ങൾ ചെയ്യുന്നവർക്കെതിരെ കർശന നടപടി സ്വീകരിക്കുമെന്ന് പൊലീസ് അറിയിച്ചു.