പുതമൺപാലം ജില്ലയുടെ തീർത്ഥാടന രംഗത്ത് ഏറെ പ്രധാനപ്പെട്ടത് : മന്ത്രി പി. എ.മുഹമ്മദ് റിയാസ്റാ
റാന്നി പുതമൺ പാലം പത്തനംതിട്ട ജില്ലയുടെ തീർത്ഥാടന രംഗത്ത് ഏറെ പ്രധാനപ്പെട്ടതെന്ന് പൊതുമരാമത്ത് വകുപ്പ് മന്ത്രി പി. എ. മുഹമ്മദ് റിയാസ്. സംസ്ഥാന സർക്കാർ 2.63 കോടി രൂപ ചെലവിൽ നിർമ്മിക്കുന്ന പുതുമൺ പുതിയ പാലത്തിൻറെ നിർമ്മാണ ഉദ്ഘാടനം ഓൺലൈനായി നിർവഹിച്ചു സംസാരിക്കുകയായിരുന്നു അദ്ദേഹം. റാന്നി, കോഴഞ്ചേരി എന്നിവിടങ്ങളെ തമ്മിൽ ബന്ധിപ്പിക്കുന്ന മേലൂർക്കര റാന്നി റോഡിലാണ് പാലം ഉള്ളത്. പാലം അപകടാവസ്ഥയിൽ ആയതിനെ തുടർന്ന് ചെറു വാഹനങ്ങൾക്ക് കടന്നുപോകാൻ സമാന്തരമായി താൽക്കാലിക പാലം നിർമ്മിക്കുന്നതിന് 30 ലക്ഷം രൂപ അനുവദിച്ചിരുന്നു. ശബരിമല തീർത്ഥാടകർ പ്രധാനമായി ഉപയോഗിക്കുന്ന പാതയാണ് പുതമൺ പാലം. തിരുവാഭരണം, തങ്കയങ്കി എന്നിവ കടന്നു പോകുന്നതിനുള്ള പാതയായും ഉപയോഗിക്കുന്നു. മാരാമൺ, ചെറുകോൽപ്പുഴ കൺവെൻഷനുകൾ എന്നിവയിലേക്കുള്ള പാതയും കൂടിയാണ്. പാലത്തിൻറെ നിർമ്മാണം പ്രത്യേകം ശ്രദ്ധ നൽകി സമയബന്ധിതമായി പൂർത്തിയാക്കും. ശബരിമല തീർത്ഥാടനവുമായി ബന്ധപ്പെട്ട് പൊതുമരാമത്ത് വകുപ്പിന്റെ റോഡുകൾ മികച്ച രീതിയിൽ നവീകരിച്ചിട്ടുണ്ട്. ശേഷിക്കുന്ന അറ്റകുറ്റ പണികൾ അടിയന്തരമായി പൂർത്തിയാക്കാൻ നിർദ്ദേശം നൽകിയിട്ടുണ്ടെന്നും മന്ത്രി പറഞ്ഞു. പുതുതായി നിർമ്മിക്കുന്ന പുതുമൺ പാലം എട്ടു മീറ്റർ വീതം നീളമുള്ള രണ്ട് സ്പാനുകളോട് കൂടിയ സബ്മേഴ്സിബിൾ ബ്രിഡ്ജ് ആയാണ് വിഭാവനം ചെയ്തിരിക്കുന്നത്. 7.5 മീറ്റർ ക്യാരേജ് വേ യും ഇരുവശങ്ങളിലും 1.5 മീറ്റർ വീതിയുള്ള നടപ്പാതയും ഉൾപ്പെടെ 11 മീറ്ററാണ് പാലത്തിൻറെ വീതി. നിർമ്മാണ പൂർത്തീകരണ കാലാവധി 12 മാസമാണ്.