സംസ്ഥാനത്ത് ഇന്ന് ഇടത്തരം നേരിയ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ്.വരുന്ന ചൊവ്വാഴ്ച വരെ നേരിയ മഴ തുടരും.ഇടിമിന്നലോട് കൂടിയ മഴയ്ക്കാണ് സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു. തെക്കുപടിഞ്ഞാറൻ ബംഗാള് ഉള്ക്കടലിന് മുകളിലായി അതി തീവ്ര ന്യൂനമർദ്ദം സ്ഥിതി ചെയ്യുന്നുവെങ്കിലും കേരളത്തെ നിലവില് അത് ബാധിക്കില്ല. അതിനാല് കേരള, കർണാടക ലക്ഷദ്വീപ് തീരങ്ങളില് മത്സ്യബന്ധനത്തിന് തടസ്സമില്ല.അതി തീവ്ര ന്യൂനമര്ദ്ദം വടക്കു പടിഞ്ഞാറ് ദിശയില് നീങ്ങി ഇന്ന് ഉച്ചയോടെ വടക്കന് ശ്രീലങ്കക്കു മുകളില് ട്രിങ്കോമലിക്കും ജാഫ്നയും ഇടയില് കരയില് പ്രവേശിക്കുമെന്നാണ് കാലാവസ്ഥ വകുപ്പ് പ്രവചിച്ചിരിക്കുന്നത്. തെക്കന് കേരളത്തിന് സമീപം തെക്ക് കിഴക്കന് അറബിക്കടലിനു മുകളില് ചക്രവാതച്ചുഴി സ്ഥിതി ചെയ്യുന്നുണ്ട്. ഇതിന്റെയെല്ലാം സ്വാധീനഫലമായാണ് ഈ ദിവസങ്ങളില് മഴ ലഭിക്കുക എന്നും കാലാവസ്ഥ വകുപ്പ് നല്കിയ മുന്നറിയിപ്പില് പറയുന്നു.