ഓർത്തഡോക്സ് –യാക്കോബായ സഭാതർക്കത്തിൽ സംസ്ഥാന സർക്കാരിന്റെ നിലപാടിനെതിരെ രൂക്ഷവിമർശനവുമായി മലങ്കര ഓർത്തഡോക്സ് സഭാ പരമാധ്യക്ഷൻ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ. മലങ്കര സഭയുടെ ഹൃദയത്തിൽ ആഴത്തിൽ മുറിവേറ്റിരിക്കുകയാണെന്ന് കാതോലിക്കാ ബാവാ പറഞ്ഞു. സഭയുടെ ശാശ്വത സമാധാനത്തിനായുള്ള നീതിയുക്തമായ പരിശ്രമങ്ങളെ സർക്കാർ തലത്തിൽ ഔദ്യോഗികമായി അട്ടിമറിക്കാൻ ശ്രമം നടന്നതായി സഭ കരുതുന്നതായും അദ്ദേഹം വ്യക്തമാക്കി.
സഭാതർക്കവുമായി ബന്ധപ്പെട്ട് ഇന്ന് രാവിലെ കോട്ടയം ദേവലോകം അരമനയിൽ ചേർന്ന അടിയന്തര യോഗങ്ങൾക്ക് ശേഷം മാധ്യമങ്ങളോട് സംസാരിക്കുകയായിരുന്നു കാതോലിക്കാ ബാവാ. സഭാ വർക്കിംഗ് കമ്മിറ്റി, ആലോചനാസമിതി, ലീഗൽ സെൽ എന്നിവയുടെ യോഗങ്ങളാണ് ചേർന്നത്.പരിശുദ്ധ പാത്രിയർക്കീസ് ബാവായുടെ സന്ദർശനവുമായി ബന്ധപ്പെട്ട് കോടതിയിൽ സംസ്ഥാന സർക്കാർ സ്വീകരിച്ച നിലപാട് സഭയെ ആശ്ചര്യപ്പെടുത്തുന്നതാണെന്ന് കാതോലിക്കാ ബാവാ പറഞ്ഞു. സഭയുടെ സമാധാനശ്രമങ്ങളെ സർക്കാർ തലത്തിൽ അട്ടിമറിക്കാൻ ശ്രമം നടന്നുവെന്ന ഗുരുതരമായ ആരോപണമാണ് അദ്ദേഹം ഉന്നയിച്ചത്.എന്നാൽ ഇത്തരം നടപടികൾക്കിടയിലും സഭയിൽ ശാശ്വത സമാധാനം സ്ഥാപിക്കുന്നതിനുള്ള പരിശ്രമങ്ങളിൽ നിന്ന് പിന്നോട്ടില്ലെന്നും കാതോലിക്കാ ബാവാ വ്യക്തമാക്കി. മുൻഗാമികളായ പിതാക്കന്മാർ എക്കാലത്തും നിലകൊണ്ടതുപോലെ നീതിക്കും സത്യത്തിനും വേണ്ടിയുള്ള പോരാട്ടം തുടരുമെന്നും അദ്ദേഹം പറഞ്ഞു.
‘സത്യം ജയിക്കും, സത്യം ജയിക്കും, സത്യം ജയിക്കും’ എന്ന മുൻഗാമികളായ പിതാക്കന്മാരുടെ വാക്കുകൾ ആവർത്തിച്ചാണ് കാതോലിക്കാ ബാവാ മാധ്യമങ്ങളോടുള്ള പ്രതികരണം അവസാനിപ്പിച്ചത്.
സഭാതർക്കത്തിൽ സർക്കാരിന്റെ കോടതി നിലപാടിനെതിരെ ഓർത്തഡോക്സ് സഭയുടെ പ്രതിഷേധം ശക്തമാകുന്നതിന്റെ സൂചനയാണ് കാതോലിക്കാ ബാവായുടെ പ്രതികരണം.

