മോന്സണ് മാവുങ്കല് പ്രതിയായ പുരാവസ്തു തട്ടിപ്പ്കേസില് കെപിസിസി അധ്യക്ഷൻ കെ. സുധാകരനെ പ്രതിയാക്കി കുറ്റപത്രം. സുധാകരനെ രണ്ടാം പ്രതിയാക്കി ആദ്യ കുറ്റപത്രം. എറണാകുളം എസിജെഎം കോടതിയില് സമര്പ്പിച്ചത്. തട്ടിപ്പിന് വേണ്ടി സുധാകരന് ഗൂഢാലോചന നടത്തിയെന്നാണ് കുറ്റപത്രത്തില് പറയുന്നത്
തട്ടിപ്പിന് വേണ്ടി സുധാകരന് ഗൂഢാലോചന നടത്തിയെന്നതിനാണ് ക്രൈം ബ്രാഞ്ച് ഡിവൈഎസ്പി ആര് റസ്തം സമര്പ്പിച്ച കുറ്റപത്രത്തില് പറയുന്നത്. മോന്സണ് വ്യാജ ഡോക്ടറാണന്നറിഞ്ഞിട്ടും മറച്ചുവെച്ചുവെന്നാണ് സുധാകരണെതിരെയുള്ള ആരോപണം. വഞ്ചന, ഗൂഡാലോചന തുടങ്ങിയ കുറ്റങ്ങളാണ് സുധാകരനെതിരെ ചുമത്തിയിരിക്കുന്നത്.
420, 406, 120 ബി വകുപ്പുകള് ചുമത്തിയാണ് ക്രൈം ബ്രാഞ്ച് കുറ്റപ്പത്രം സമർപ്പിച്ചത്.
25 ലക്ഷം രൂപയുടെ തട്ടിപ്പ് കേസില് കെ സുധാകരൻ 10 ലക്ഷം കൈപ്പറ്റിയെന്നും കുറ്റപത്രത്തില് പറയുന്നുണ്ട്. നേരത്തെ കഴിഞ്ഞ ജൂണ് മാസം ക്രൈംബ്രാഞ്ച് കെ സുധാകരനെ ചോദ്യം ചെയ്ത് അറസ്റ്റ് ചെയ്ത് ജാമ്യത്തില് വിട്ടിരുന്നു. കോടതി മുൻകൂർ ജാമ്യം അനുവദിച്ചതിനെ തുടർന്നായിരുന്നു ക്രൈം ബ്രാഞ്ച് നടപടി. തുടർന്ന് കേസില് എൻഫോഴ്സ്മെന്റ് ഡയറക്ടറേറ്റും കെ സുധാകരനെ ചോദ്യം ചെയ്തിരുന്നു.
2018 ലാണ് കേസിന് ആസ്പദമായ സംഭവം. 2018-ല് സുധാകരന്റെ സാന്നിധ്യത്തിലാണ് മോൻസണ് മാവുങ്കലിന് പണം കൈമാറിയതെന്ന് കേസിലെ പരാതിക്കാരനായ അനൂപ് അഹമ്മദ് മൊഴി നല്കിയിരുന്നത്. പണം വാങ്ങുന്നത് കണ്ടുവെന്ന് മോൻസന്റെ മുൻ ജീവനക്കാരൻ ജിൻസണും മൊഴി നല്കിയിരുന്നു. മോൻസണില് നിന്ന് പണം വാങ്ങിയെന്ന ആരോപണം സുധാകരൻ നേരത്തെ തള്ളിയിരുന്നു.