പിറവം: കോട്ടയത്തെ ഭിന്നശേഷി സൗഹൃദമാക്കുന്നതിൽ തോമസ് ചാഴികാടൻ നടത്തിയ പരിശ്രമങ്ങൾക്ക് നന്ദി ചൊല്ലാൻ കൃതിമക്കാലിൽ ഗീരിഷെത്തി. പിറവം മണ്ഡലത്തിൽ ഇന്നലെ നടത്തിയ പര്യടനത്തിലായിരുന്നു ഗിരീഷിന്റെ വരവും കൈനിറയെ പൂക്കൾ സമ്മാനിച്ചതും. നഗരസഭ 14-ാം വാർഡിലെ താമസക്കാരനായ കൂരാപ്പിള്ളിൽ കെ.യു ഗീരിഷിന് അർബുദം ബാധിച്ചതിനെ തുടർന്ന് വലതുകാൽ മുറിച്ചുമാറ്റേണ്ടി വന്നു. കൃത്രിമക്കാലിലാണ് ഇപ്പോൾ ഗിരീഷിന്റെ സഞ്ചാരം. ഭാര്യ രശ്മിയുടെ സഹായത്തോടെ ടൗണിൽ ലോട്ടറിവിറ്റാണ് രണ്ടുമക്കളടങ്ങുന്ന കുടുംബത്തെ ഗീരിഷ് പോറ്റുന്നത്.
തോമസ് ചാഴികാടന്റെ പര്യടനമുണ്ടെന്നറിഞ്ഞതോടെ ഇന്നലെ ലോട്ടറി വിൽപ്പന ഉപേക്ഷിച്ച് കാത്തുനിൽക്കുകയായിരുന്നു ഗീരീഷ്. പര്യടനമെത്താൻ വൈകിയെങ്കിലും പരാതിയില്ലാതെ കാത്തുനിന്ന ഗിരീഷ് സാധിക്കുന്ന രീതിയിലെല്ലാം ചാഴികാടന്റെ വിജയത്തിനായി പ്രവർത്തിക്കുമെന്ന് മുന്നണി നേതാക്കളോട് പറഞ്ഞു.
സാമൂഹിക നീതി വകുപ്പിന്റെ സ്റ്റാൻഡിംഗ് കമ്മിറ്റിയംഗമെന്നമെന്ന നിലയിൽ കോട്ടയത്തെ ഭിന്നശേഷി സൗഹൃദമാക്കാൻ തോമസ് ചാഴികാടൻ ഏറെ പരിശ്രമങ്ങൾ നടത്തിയിരുന്നു. ആർട്ടിഫിഷ്യൽ ലിംബ്‌സ് മാനുഫാക്ചറിംഗ് കോർപ്പറേഷൻ ഓഫ് ഇന്ത്യ, അലി യാവർ ജംഗ് നാഷണൽ ഇൻസ്റ്റിറ്റ്യൂട്ട് ഫോർ ദി ഹിയറിങ്ങ് ഹാൻഡിക്യാപ്ഡ്, സംസ്ഥാന സാമൂഹിക നീതി വകുപ്പ് എന്നിവയുടെ സഹകരണത്തോടെയായിരുന്നു ചാഴികാടന്റെ പരിശ്രമങ്ങൾ. മണ്ഡലത്തിലെ മുഴുവൻ ഭിന്നശേഷിക്കാരെയും കണ്ടെത്തുന്നതിനായി 12 ക്യാപുകളാണ് മണ്ഡലത്തിൽ നടത്തിയത്. മണ്ഡലത്തിലെ 1412 ഭിന്നശേഷിക്കാർക്കു സഹായഉപകരണങ്ങൾ സൗജന്യമായി നൽകി.
ഭിന്നശേഷി സൗഹൃദമണ്ഡലമാക്കുന്നതിനായി നടത്തിയ പരിശ്രമങ്ങൾ ഏറെ സംതൃപ്തി സമ്മാനിച്ച പ്രവർത്തനമാണെന്ന് തോമസ് ചാഴികാടൻ പറഞ്ഞു.
