ആലപ്പുഴ മെഡിക്കല്‍ കോളജില്‍ അണുബാധയുണ്ടായി സ്ത്രീ മരിച്ച സംഭവം: മുഖ്യമന്ത്രിക്ക് പരാതി നല്‍കി ഭര്‍ത്താവ്
ആലപ്പുഴ മെഡിക്കല്‍ കോളജില്‍ പ്രസവ തുടര്‍ ചികിത്സയ്ക്കിടെ അണുബാധ ഉണ്ടായ സ്ത്രീ മരിച്ച സംഭവത്തിൽ മുഖ്യമന്ത്രിക്ക് പരാതി. അമ്പലപ്പുഴ കരൂര്‍ സ്വദേശി ഷിബിന ആണ് മരിച്ചത്.
അണുബാധയെ തുടര്‍ന്ന് ഷിബിനയുടെ കരള്‍ ഉള്‍പ്പടെയുള്ള ആന്തരീക അവയവങ്ങള്‍ക്ക് തകരാര്‍ സംഭവിച്ചിരുന്നു. മരണത്തില്‍ വിശദമായ അന്വേഷണം ആവശ്യപ്പെട്ട ഷിബിനയുടെ ഭര്‍ത്താവ് മുഖ്യമന്ത്രിക്ക് പരാതി നല്‍കി.
ഹൃദയാഘാതമാണ് മരണ കാരണമെന്നു മെഡിക്കല്‍ കോളേജ് സൂപ്രണ്ട് പറഞ്ഞു.
ഇക്കഴിഞ്ഞ മാര്‍ച്ച് 26നാണ് ഷിബിന ആലപ്പുഴ മെഡിക്കല്‍ കോളേജില്‍ പ്രസവിക്കുന്നത്. പ്രസവശേഷം വലിയ ശാരീരിക ബുദ്ധിമുട്ടുകള്‍ അനുഭവിച്ച ഷിബിനയെ മെഡിക്കല്‍ കോളേജില്‍ നിന്ന് ഡിസ്ചാര്‍ജ് ചെയ്തു.
മാര്‍ച്ച് 30ന് ആരോഗ്യനില വഷളായതോടെ വീണ്ടും മെഡിക്കല്‍ കോളേജില്‍ അഡ്മിറ്റ് ചെയ്തു. ഈ ഘട്ടത്തിലും വേണ്ട ചികിത്സ ലഭിച്ചില്ല. ചികിത്സാ പിഴവ് മൂലമാണ് മരണമെന്നും ബന്ധുക്കള്‍.
അതേസമയം പ്രസവത്തിന് മുന്‍പ് തന്നെ ഷിബിനക്ക് മൂത്രാശയത്തില്‍ അണുബാധ ഉണ്ടായിരുന്നെന്നും. രണ്ട് തവണ ഉണ്ടായ ഹൃദയാഘാതമാണ് മരണ കാരണമെന്ന് മെഡിക്കല്‍ കോളേജ് സൂപ്രണ്ട് അബ്ദുള്‍ സലാം പറഞ്ഞു.
ഇന്നലെ വെന്റിലേറ്ററിലേക്ക് മാറ്റിയ ഷിബിന ഇന്ന് മരണപ്പെടുകയായിരുന്നു. മരണവിവരം അറിഞ്ഞതോടെ വലിയ പ്രതിഷേധമാണ് മെഡിക്കല്‍ കോളേജില്‍ ഉണ്ടായത്.
ഷിബിനയുടെ കുടുംബത്തിന്റെ പരാതിയില്‍ ആരോഗ്യവകുപ്പും പോലീസും അന്വേഷണം ആരംഭിച്ചു.പോസ്റ്റ്‌മോര്‍ട്ടം റിപ്പോര്‍ട്ടു ഉള്‍പ്പെടെ ലഭിച്ചതിനുശേഷം തുടര്‍നടപടികള്‍ സ്വീകരിക്കാനാണ് പോലീസിന്റെ തീരുമാനം.