അൽപ്പം ദൈർഘ്യമുള്ള വിമാനയാത്രയാണെങ്കിൽ അതായത് 4 മുതൽ 7 മണിക്കൂർ വരെയുള്ള യാത്രയാണെങ്കിൽ യാത്രക്കാർ ഫോണിൽ സിനിമ കാണുകയോ പുസ്തകം വായിക്കുകയോ ആണ് പതിവ്. എന്നാൽ സിനിമ കാണുകയോ വായിക്കുകയോ ഒന്നും ചെയ്യാതെ വെറുതെ ജനാലയിലൂടെ പുറത്തേക്ക് മാത്രം നോക്കിയിരിക്കുന്ന ചിലരുണ്ട്. ഇതാണ് ഇപ്പോഴത്തെ ട്രാവൽ ട്രെൻഡ്. ഇതിന് റോ-ഡോഗിങ് എന്നാണ് പേരിട്ടിരിക്കുന്നത്.
യാത്രയ്ക്കിടയിൽ ഒരു തരത്തിലുള്ള എൻടെർടെയ്ൻമെൻ്റുകളും ഉപയോഗിക്കാതെ പൂർത്തിയാക്കുന്ന ഈ ട്രെൻഡ് നീണ്ട യാത്രയിലാണ് യാത്രക്കാർ ചെയ്യാറുള്ളത്. ഫ്ലൈറ്റ് സ്ക്രീനിലെ മാപ്പിൽ മാത്രം നോക്കിയിരിക്കും. ഇതിലൂടെ വിമാനം എവിടെയെത്തിയെന്ന് ട്രാക്ക് ചെയ്യാൻ കഴിയും.
ഫോണും ഒന്നും ഉപയോഗിക്കാതെ യാത്ര പൂർത്തിയാക്കിയവർ പലരും തങ്ങളുടെ അനുഭവങ്ങൾ ടിക് ടോകിൽ പങ്കുവെച്ചു തുടങ്ങിയതോടെയാണ് ഈ ട്രെൻഡിന് പ്രചാരം കിട്ടിയത്. ഒന്നും ചെയ്യാതെ ഇരുന്നപ്പോഴാണ് അത് തങ്ങൾക്ക് സാധിക്കുമെന്നും മനസിൻ്റെ ശക്തി എത്രത്തോളമുണ്ടെന്നും ഇവർക്ക് മനസ്സിലായത്. തുടക്കത്തിൽ ഇങ്ങനെ വെറുതെയിരിക്കാൻ അൽപ്പം ബുദ്ധിമുട്ടുണ്ടാകുമെന്നും ഇവർ പറയുന്നു.
ഈ ട്രെൻഡിന് റോ-ഡോഗിങ് എന്ന പേരു വിളിച്ച വെസ്റ്റ് എന്ന ലണ്ടൻ യാത്രക്കാരൻ പറഞ്ഞതിങ്ങനെ : നിങ്ങൾക്ക് കണ്ണു കാണില്ലെന്ന് വിചാരിക്കുക. മുന്നിലും സൈഡിലുമുള്ള സീറ്റ് നിങ്ങൾക്ക് തൊട്ടറിയാം. കേൾക്കുന്നത് എഞ്ചിൻ ശബ്ദം മാത്രമായിരിക്കും. ഈ ട്രെൻഡ് പൂർത്തിയാക്കാൻ ചിലർ ഭക്ഷണം പോലും കഴിക്കാതെയും വെള്ളം പോലും കുടിക്കാതെയും ഇരിക്കും. ഇത്തരം ട്രെൻഡുകളെല്ലാം ഓരോ തരം ചലഞ്ചുകൾ ആണ്.