തൊട്ടടുത്ത അയൽക്കാരുടെ മരം കാരണം വലിയ വഴക്കായി. ബന്ധം വഷളായി. അവസാനം മരം നെടുകെ മുറിച്ചു. അയൽവീട്ടുകാരുടെ ഭാഗത്തേക്ക് നീണ്ടു നിൽക്കുന്ന ഭാഗമാണ് മുറിച്ചത്. എന്തായിരുന്നു പ്രശ്നം? ആ മരത്തിൽ കിളികൾ ധാരാളമായി വന്നിരിക്കാനും കൂടു കൂട്ടാനും തുടങ്ങിയതാണ് പ്രശ്നത്തിൻ്റെ തുടക്കം. കിളികളുടെ കാഷ്ഠം നേരെ വീഴുന്നത് അയൽക്കാരൻ്റെ കാറിൻ്റെ മുകളിലാണ്. അയൽക്കാരന് കാർ കഴുകാനേ നേരമുള്ളൂ.
അവസാനം ട്രീ കട്ടേഴ്സ് വന്നു. മരം നെടുകെ മുറിച്ച് പ്രശ്നം പരിഹരിച്ചു. സംഭവം നടന്നത് 2021-ലാണ്. എന്നാൽ ഈയിടെ ആരോ മരത്തിൻ്റെ ഫോട്ടോ എടുത്ത് ഒരു ന്യൂസ് ചാനലിന് അയച്ചു കൊടുത്തു. സംഗതി വൈറലായി. രണ്ട് അയൽക്കാരും മാധ്യമങ്ങളെ കാണാൻ കൂട്ടാക്കിയില്ല. അവിടെയുള്ള മറ്റുള്ളവർ പറഞ്ഞത് വാർത്ത പരന്നതോടെ അവർ തമ്മിലുള്ള ശത്രുത കൂടിയെന്നാണ്. വഴക്ക് വെറും തമാശയായിട്ടാണ് മറ്റ് താമസക്കാർ ആദ്യം കരുതിയത്.
പകുതി മുറിച്ച മരമുള്ള വീട് ഇപ്പോൾ എല്ലാവർക്കും ഒരു ലാൻഡ് മാർക്കായി മാറിയിട്ടുണ്ട്. അതു വഴി പോകുന്നവരൊക്കെ വന്നു കണ്ട് ഫോട്ടോയും എടുത്ത് പോകുന്നുണ്ട്. 70 വയസ്സ് കഴിഞ്ഞ മിസ്ട്രി, ലീസ് എന്നിവരാണ് അയൽക്കാർ. ലണ്ടനിലെ വാട്ടർതോർപ്പിലാണ് പകുതി മരം മുറിച്ച വീട്. മരം ഇപ്പോൾ ഒരു ടൂറിസ്റ്റ് ആകർഷണമായി മാറിക്കഴിഞ്ഞു.