നിവിന് പോളി ചിത്രമായ പ്രേമത്തിലൂടെ പ്രശസ്തമായി പിന്നീട് ‘പ്രേമം പാലം’ എന്നറിയപ്പെട്ട പാലം അടച്ചുപൂട്ടി അധികൃതർ.
ആലുവ കടുങ്ങല്ലൂര് പഞ്ചായത്തിലെ ഉളിയന്നൂരില് നിന്ന് ആരംഭിച്ച് യുസി കോളജിന് സമീപം അവസാനിക്കുന്ന പാലത്തിന് 4 കിലോമീറ്റര് നീളമുണ്ട്. പാലത്തിൻ്റെ രണ്ടറ്റത്തും മധ്യഭാഗത്തെ 2 പ്രവേശന കവാടത്തിലുമായി 4 ഇരുമ്പ് ഗേറ്റുകള് ഉപയോഗിച്ചാണ് പാലം അടച്ചിരിക്കുന്നത്.
കമിതാക്കളുടെയും ലഹരിമരുന്ന് വില്പ്പനക്കാരുടെയും സാമൂഹിക വിരുദ്ധരുടെയും ശല്യം കൂടിയതിനാല് പാലം അടയ്ക്കണമെന്ന് വാര്ഡ് കൗണ്സിലര് ടിൻ്റു രാജേഷ് നവകേരള സദസില് മുഖ്യമന്ത്രിക്ക് പരാതി നല്കിയിരുന്നു. ഇതേത്തുടര്ന്നാണ് നടപടി.പ്രേമം സിനിമ ഇറങ്ങുന്നതു വരെ നാട്ടുകാര്ക്ക് മാത്രം അറിവുണ്ടായിരുന്ന പാലം കാണാന് അതിന് ശേഷം പുറത്തു നിന്നുള്ളവരും വന്നു തുടങ്ങി. അതോടെയാണ് പ്രേമം പാലം എന്ന പേര് കിട്ടിയത്.
ഭൂതത്താന്കെട്ടില് നിന്ന് ആലുവയിലെത്തുന്ന പെരിയാര്വാലി കനാല് വെള്ളം പറവൂരിലേക്ക് കൊണ്ടുപോകാനാണ് നീര്പ്പാലം നിര്മ്മിച്ചത്. 45 വര്ഷം മുന്പ് നിര്മ്മിച്ചതാണ് ഉയരമേറിയ നീര്പ്പാലം.പാലത്തിൻ്റെ അടിത്തട്ടിലൂടെയാണ് വെള്ളം ഒഴുകുന്നത്. മേല്ത്തട്ടിലൂടെ പ്രകൃതി ഭംഗി ആസ്വദിച്ച് നടക്കാം.