കോട്ടയം: ഇലക്ട്രിക്കൽ ഇൻസ്പെക്ടറേറ്റ് വകുപ്പിന്റെ വെബ്സൈറ്റ് നവീകരിച്ചു. നവീകരിച്ച വെബ്സൈറ്റിന്റെ ഉദ്ഘാടനം വൈദ്യുതി വകുപ്പ് മന്ത്രി കെ. കൃഷ്ണൻകുട്ടി നിർവഹിച്ചു. വകുപ്പിനെ കുറിച്ചും, വൈദ്യുതമേഖലയിലും വൈദ്യുതസുരക്ഷയുമായി ബന്ധപ്പെട്ടും കൈകാര്യം ചെയ്യുന്ന നിയമങ്ങളും മാനദണ്ഡങ്ങളും നിയന്ത്രണങ്ങളും വെബ്സൈറ്റിൽ ചേർത്തിട്ടുണ്ട്.
വകുപ്പിൽനിന്നു നൽകിവരുന്ന സേവനങ്ങളെക്കുറിച്ചും, സേവനങ്ങളുടെ സ്ഥിതിവിവര കണക്കുകളും ഓൺലൈൻ സേവനങ്ങളുടെ വിവരങ്ങളും അടങ്ങിയ ഡാഷ് ബോർഡ് ഉൾപ്പെടുത്തിയിട്ടുണ്ട്. ലളിതവും പൊതുജനങ്ങൾക്ക് വേഗത്തിൽ മനസ്സിലാകുന്ന വിധത്തിലും പ്രാഥമികമായി മലയാളത്തിലും ഇംഗ്ലീഷ് ഭാഷ തെരഞ്ഞെടുക്കുവാനുള്ള സൗകര്യത്തോടു കൂടിയുമാണ് വെബ്സൈറ്റ് തയ്യാറാക്കിയിട്ടുള്ളത്. സംരക്ഷ, സുരക്ഷ എന്നീ വെബ്സൈറ്റുകൾ വഴി നൽകുന്ന അപേക്ഷകളുടെ തൽസ്ഥിതി അറിയുന്നതിനുള്ള ലിങ്കും പുതുക്കിയ വെബ്സൈറ്റിൽ കൊടുത്തിട്ടുണ്ട്. വെബ്സൈറ്റ് ലിങ്ക് https://dei.kerala.gov.in/
