നവവത്സര ആശംസ നേരാതിരുന്നതിന് യുവാവിനെ ബ്ലേഡ് കൊണ്ട് മേലാസകലം കോറിപ്പരിക്കേല്പ്പിച്ചു. തൃശൂർ മുള്ളൂര്ക്കരയിലാണ് സംഭവം. ആറ്റൂര് സ്വദേശി സുഹൈബിനാണ് കുത്തേറ്റത്. കാപ്പ കേസ് പ്രതിയായ ഷാഫിയാണ് 22കാരനായ സുഹൈബിനെ കുത്തിയതെന്ന് പൊലീസ് പറഞ്ഞു. പരിക്കേറ്റ സുഹൈബ് തൃശൂര് മെഡിക്കല് കോളജ് ആശുപത്രിയില് ചികിത്സയിലാണ്.
സംഭവ സമയമായ അർദ്ധരാത്രിയിൽ ഷാഫി സഹൃത്തുക്കള്ക്കൊപ്പം ബസ് വെയ്റ്റിങ് ഷെഡില് ഇരിക്കുകയായിരുന്നു. ആ സമയത്ത് അതുവഴി വന്ന സുഹൈബ് അവിടെയുള്ള സുഹൃത്തുക്കളോടെല്ലാം പുതുവര്ഷാശംസകള് പറഞ്ഞു. എന്നാല് ഷാഫിയോട് മാത്രം ആശംസ പറഞ്ഞിരുന്നില്ല. തന്നോട് മാത്രം ആശംസ പറഞ്ഞില്ലെന്ന കാരണത്താല് ഷാഫി സുഹൈബിനെ ആക്രമിക്കുകയായിരുന്നു.അക്രമത്തിന് പിന്നാലെ പ്രതി ഒളിവില് പോയി. സുഹൈബിനെ അവിടെയുള്ളവര് തന്നെ ആശുപത്രിയില് എത്തിക്കുകയായിരുന്നു. പ്രതിക്കായി തെരച്ചില് ഊര്ജിതമാക്കിയതായി പൊലീസ് പറഞ്ഞു.