വഞ്ചിയൂര് കോടതിയിലെ യുവ അഭിഭാഷക ജെ വി ശ്യാമിലിയെ മര്ദ്ദിച്ച കേസില് സീനിയര് അഭിഭാഷകനായ ബെയ്ലിന് ദാസിനെ റിമാന്ഡ് ചെയ്തു. ബെയ്ലിന്റെ ജാമ്യാപേക്ഷ കോടതി ശനിയാഴ്ച പരിഗണിക്കും. തടഞ്ഞുവെക്കല്, മര്ദ്ദനം തുടങ്ങിയ വകുപ്പുകള് ചേര്ത്താണ് പോലീസ് കേസെടുത്തിരിക്കുന്നത്. മര്ദ്ദനത്തിന് പിന്നാലെ ഒളിവില്പോയ ബെയ്ലിന് ദാസിനെ കഴിഞ്ഞ ദിവസം പോലീസ് നാടകീയമായാണ് പിടികൂടിയത്.മര്ദ്ദനമേറ്റ ജൂനിയര് അഭിഭാഷക പാറശ്ശാല കരുമാനൂര് കോട്ടവിള പുതുവല് പുത്തന്വീട്ടില് ശ്യാമിലി(26)യുടെ പരാതിയുടെ അടിസ്ഥാനത്തില് സ്ത്രീത്വത്തെ അപമാനിച്ചതുള്പ്പെടെ ജാമ്യമില്ലാ വകുപ്പുകള് പ്രകാരമാണ് പോലീസ് കേസെടുത്തിരിക്കുന്നത്. ചൊവ്വാഴ്ച വഞ്ചിയൂരിലെ വക്കീല് ഓഫീസില് വെച്ചാണ് ഇവര്ക്കു മര്ദനമേറ്റത്.