പച്ചക്കറികളും പച്ചമുളക് ചേര്‍ത്തരച്ച തേങ്ങയും കട്ടിത്തൈരും വെളിച്ചെണ്ണയും കറിവേപ്പിലയും ചേര്‍ന്ന സ്വാദിഷ്ഠമായ അവിയല്‍ നമ്മള്‍ മലയാളികള്‍ക്ക് സദ്യയിലെ ഒഴിച്ചുകൂടാനാവാത്ത ഒരു വിഭവമാണ്.
ചേന, വാഴക്ക, കുമ്പളങ്ങ, മത്തന്‍, മുരിങ്ങക്ക, കാരറ്റ്, പടവലങ്ങ തുടങ്ങിയവയാണ് അവിയലിന്‍റെ ചേരുവകള്‍. ചിലര്‍ തൈരിനു പകരം മാങ്ങ ഉപയോഗിക്കുന്നു.
ചോറിനൊപ്പമോ അല്ലെങ്കില്‍ പ്രാതല്‍വിഭവങ്ങളുടെ കൂടെയോ അവിയല്‍ കഴിക്കാം.
ചെറിയ അളവില്‍ അടുക്കളയില്‍ ബാക്കിയുള്ള പച്ചക്കറികള്‍ പാഴായിപ്പോകാതെ വെയ്ക്കാന്‍ പറ്റിയ നല്ലൊരു വിഭവമാണ് അവിയല്‍.
അവിയലുണ്ടായതിനെക്കുറിച്ചൊരു ഐതിഹ്യവുമുണ്ട്.
മഹാഭാരതകഥയില്‍ അജ്ഞാതവാസക്കാലത്ത് പഞ്ചപാണ്ഡവരിലെ ഭീമസേനനാണത്രേ ആദ്യമായി അവിയലുണ്ടാക്കിയത്.
അജ്ഞാതവാസക്കാലത്തിനിടയില്‍ പാണ്ഡവര്‍ക്ക് വിരാടരാജാവിന്‍റെ കൊട്ടാരത്തില്‍ വേഷപ്രച്ഛന്നരായി കഴിയേണ്ടിവന്നു.
അവിടെ ഭീമന്‍റെ വേഷം പാചക്കാരന്‍റേതായിരുന്നു.
കൊട്ടാരത്തില്‍ അപ്രതീക്ഷിതമായി ധാരാളം അതിഥികൾ എത്തിയപ്പോള്‍ ഒരു പ്രത്യേക കറി വെയ്ക്കാന്‍ മാത്രമുള്ള പച്ചക്കറി അടുക്കളയില്‍ ഉണ്ടായിരുന്നില്ല.
ഭീമന്‍ എന്തു ചെയ്തെന്നോ?
എല്ലാം പച്ചക്കറികളും കൂടി വേവിച്ചെടുത്ത് തേങ്ങയും അരച്ചുചേര്‍ത്ത് അവിയലാക്കി.
സദ്യ ഗംഭീരമാവുകയും ചെയ്തു.