പുനരധിവസിപ്പിക്കൽ പദ്ധതിയുടെ ഭാഗമായി ദക്ഷിണാഫ്രിക്കയിൽ നിന്ന് മധ്യപ്രദേശിലെ കുനോ നാഷണൽ പാർക്കിലേക്ക് കൊണ്ടുവന്ന അഞ്ച് വയസ്സുള്ള ഗാമിനി എന്നു പേരുള്ള ചീറ്റ അഞ്ച് കുഞ്ഞുങ്ങൾക്ക് ജന്മം നൽകി.
കേന്ദ്രമന്ത്രി ഭൂപേന്ദ്ര യാദവ് എക്സിലൂടെ പങ്കു വെച്ചതാണ് ഈ വിവരം.
ഇതോടെ ഇന്ത്യയിൽ ജനിച്ച കുഞ്ഞുങ്ങളുടെ എണ്ണം 13 ആയി ഉയർന്നു.
ഇപ്പോൾ കുനോ പാർക്കിൽ കുഞ്ഞുങ്ങളുൾപ്പെടെ ആകെ ചീറ്റകളുടെ എണ്ണം 26 ആയി.
“എല്ലാവർക്കും അഭിനന്ദനങ്ങൾ, പ്രത്യേകിച്ച് ചീറ്റപ്പുലികൾക്ക് സമ്മർദ്ദരഹിതമായ അന്തരീക്ഷം ഉറപ്പാക്കിയ ഫോറസ്റ്റ് ഓഫീസർമാർ, മൃഗഡോക്ടർമാർ, ഫീൽഡ് സ്റ്റാഫ് എന്നിവരടങ്ങുന്ന ടീമിന്.”
“ഇത് വിജയകരമായ ഇണചേരലിനും കുഞ്ഞുങ്ങളുടെ ജനനത്തിനും കാരണമായി. കുനോയിലെ കുഞ്ഞുങ്ങൾ ഉൾപ്പെടെ മൊത്തം ചീറ്റകളുടെ എണ്ണം 26 ആയി. ഗാമിനിയുടെ പാരമ്പര്യം മുന്നോട്ട് കുതിക്കുന്നു: അവളുടെ ഓമനത്തമുള്ള കുഞ്ഞുങ്ങളെ പരിചയപ്പെടുത്തുന്നു,” വനം മന്ത്രി കൂട്ടിച്ചേർത്തു.
നമീബിയൻ ചീറ്റ ജ്വാല ജനുവരി 20 ന് നാല് കുഞ്ഞുങ്ങൾക്ക് ജന്മം നൽകി.
മറ്റൊരു നമീബിയൻ ചീറ്റയായ ആഷ മൂന്ന് കുഞ്ഞുങ്ങൾക്ക് ജന്മം നൽകി.
ജനുവരിയിൽ ഏഴ് കുഞ്ഞുങ്ങളുടെ ജനനം രേഖപ്പെടുത്തിയപ്പോൾ, ജനുവരി 16-ന് പ്രായപൂർത്തിയായ നമീബിയൻ ചീറ്റയായ ശൗര്യ മരണപ്പെട്ടു.
1952-ൽ ചീറ്റകൾ ഇന്ത്യയിൽ വംശനാശം സംഭവിച്ചതായി പ്രഖ്യാപിച്ചു.
പ്രോജക്ട് ചീറ്റയ്ക്ക് കീഴിൽ 2022-ൽ നമീബിയയിൽ നിന്ന് എട്ട് ചീറ്റകളെ ഇന്ത്യയിൽ കൊണ്ടുവന്നു.
ദക്ഷിണാഫ്രിക്കയിൽ നിന്നുള്ള 12 ചീറ്റകളെയും 2023 ഫെബ്രുവരിയിൽ കുനോ നാഷണൽ പാർക്കിലേക്ക് മാറ്റി.