ചെങ്ങന്നൂർ പാണ്ടനാട് പഞ്ചായത്തിൽ ഇന്ന് നടന്ന പ്രസിഡൻ്റ് തിരഞ്ഞെടുപ്പിൽ സിപിഎം പിന്തുണയോടെ കോൺഗ്രസിലെ അമ്മാളുകുട്ടി സണ്ണി പ്രസിഡൻ്റ് ആയി. ബിജെപിയിലെ ഷൈലജ രഘുറാമിനെ 6 നെതിരെ 7 വോട്ടുകൾക്ക് പരാജയപ്പെടുത്തിയാണ് കോൺഗ്രസിലെ അമ്മാളുകുട്ടി സണ്ണി വിജയിച്ചത്. 3 അംഗങ്ങളുള്ള കോൺഗ്രസിലെ അമ്മാളുകുട്ടി സണ്ണിക്ക് അനുകൂലമായി സിപിഎമ്മിലെ 4 പേർ വോട്ടു ചെയ്തതോടെയാണ് 7 വോട്ടുകൾ ലഭിച്ചത്.
അതേ സമയം 13 അംഗ ഭരണസമിതിയിൽ സിപിഎമ്മിലെ ഗോപൻ കെ. ഉണ്ണിത്താൻ ബിജെപി സ്ഥാനാർഥി ഷൈലജ രഘുറാമിന് അനുകൂലമായി വോട്ടു ചെയ്ത‌തോടെ 5 അംഗങ്ങളുള്ള ബിജെപിക്ക് 6 വോട്ടുകൾ ലഭിച്ചു.ഇന്ന് രാവിലെ 11ന് പഞ്ചായത്ത് ഹാളിൽ നടന്ന തിരഞ്ഞെടുപ്പിൽ താലൂക്ക് സപ്ലൈ ആഫീസർ സൂസൻ വരണാധികാരി ആയിരുന്നു.നേരത്തെ ബിജെപി ഭരിച്ചിരുന്ന പഞ്ചായത്തിൽ പ്രസിഡൻ്റ് ആശ വി. നായർ രാജി വെച്ചതോടെ നടന്ന ഉപതിരഞ്ഞെടുപ്പിൽ കോൺഗ്രസ് സ്ഥാനാർഥി ജോസ് വല്യാനൂർ വിജയിക്കുകയും, പിന്നീട് നടന്ന പ്രസിഡന്റ് തിരഞ്ഞെടുപ്പിൽ സിപിഎമ്മിലെ ജെയിൻ ജിനു തിരഞ്ഞെടുക്കപ്പെടുകയുമായിരുന്നു.
തദ്ദേശ സ്വയംഭരണ തിരഞ്ഞെടുപ്പിന് എട്ട് മാസം ബാക്കി നിൽക്കെ അപ്രതീക്ഷിതമായി ജെയിൻ ജിനു രാജി വെച്ചതോടെ പ്രസിഡന്റ് തിരഞ്ഞെടുപ്പ് നടന്നത്.സിപിഎമ്മുമായി ഇടഞ്ഞു നിൽക്കുന്ന ഗോപൻ കെ. ഉണ്ണിത്താൻ ഇക്കുറി ബിജെപിക്ക് അനുകൂലമായതോടെ ബിജെപിയുടെ വോട്ടിംഗ് നില ഉയർന്നു.