ഉത്തര്‍പ്രദേശിലെ പ്രയാഗ് രാജില്‍ പുരോഗമിച്ചുകൊണ്ടിരിക്കുന്ന മഹാകുംഭമേളയിലേക്ക് ഭക്തര്‍ ഒഴുകിയെത്തുകയാണ്. കുംഭമേളയ്‌ക്കെത്തുന്ന സ്ത്രീകള്‍ക്ക് സൗജന്യ സാനിട്ടറി പാഡ് വിതരണം ചെയ്യുന്ന വീഡിയോയാണ് ഇപ്പോള്‍ സോഷ്യല്‍ മീഡിയയില്‍ ചര്‍ച്ചയാകുന്നത്. വലിയ ബാഗുകളേന്തിയ ചില പെണ്‍കുട്ടികളാണ് സാനിട്ടറി പാഡ് വിതരണം ചെയ്യുന്നത്. കുംഭമേളയ്‌ക്കെത്തുന്ന സ്ത്രീകള്‍ക്ക് സൗജന്യ സാനിട്ടറി പാഡ് ഉറപ്പാക്കണമെന്ന യോഗി ആദിത്യനാഥ് സര്‍ക്കാരിന്റെ പ്രഖ്യാപനത്തിന് പിന്നാലെയാണ് ഈ നടപടി.‘‘ചില കമ്പനികള്‍ കുംഭമേളയ്ക്കായി നല്ല കാര്യങ്ങള്‍ ചെയ്യുന്നു. ഒരു കമ്പനി കുറച്ച് പെണ്‍കുട്ടികളുടെ സഹായത്തോടെ സ്ത്രീകള്‍ക്ക് സൗജന്യ സാനിട്ടറി പാഡ് വിതരണം ചെയ്യുന്നു,’’ സൗജന്യ സാനിട്ടറി പാഡ് വിതരണത്തിന്റെ വീഡിയോ പങ്കുവെച്ചുകൊണ്ട് മാധ്യമപ്രവര്‍ത്തകനായ രാജേഷ് സാഹു എക്‌സില്‍ കുറിച്ചു.