എമ്പുരാൻ വ്യാജ പതിപ്പില്‍ നിരീക്ഷണം ശക്തമാക്കി സൈബർ പൊലീസ്. വെബ് സൈറ്റുകളില്‍ നിന്ന് വ്യാജപതിപ്പ് പൊലീസ് നീക്കം ചെയ്തു. ഡൗണ്‍ലോഡ് ചെയ്താലും നടപടിയെന്ന് പൊലീസ് വ്യക്തമാക്കി. ചിത്രത്തിൻ്റെ അണിയറ പ്രവർത്തകർ പൊലീസില്‍ പരാതി നല്‍കിയേക്കും.
സിനിമ റിലീസ് ആയി മൂന്ന് മണിക്കുറുകള്‍ കഴിഞ്ഞതും ടെലിഗ്രാം ഉള്‍പ്പെടെ ഉള്ള സൈറ്റുകളില്‍ സിനിമ പ്രത്യക്ഷപ്പെട്ടിരുന്നു. ഇൻസ്റ്റാഗ്രാമില്‍ സിനിമയുടെ പല ക്ലിപ്പുകള്‍ പ്രത്യക്ഷപ്പെട്ടിരുന്നു. പൃഥ്വിരാജ് സംവിധാനം ചെയ്ത മോഹന്‍ലാല്‍ ചിത്രം എംപുരാന്‍ റിലീസ് ചെയ്ത് മണിക്കൂറുകള്‍ക്കകം ചിത്രത്തിന്‍റെ വ്യാജ പതിപ്പ് ചില വെബ്സൈറ്റുകളിലും ടെലഗ്രാമിലും പ്രത്യക്ഷപ്പെട്ടിരുന്നു. ഇത് ശ്രദ്ധയില്‍പ്പെട്ട സൈബര്‍ പൊലീസ് നടപടി ആരംഭിച്ചിരുന്നു.വ്യാജ പതിപ്പ് പ്രത്യക്ഷപ്പെട്ട വെബ്സൈറ്റുകളില്‍ നിന്നെല്ലാം അവ പൊലീസ് നീക്കം ചെയ്തു.
വ്യാജ പതിപ്പുകള്‍ പ്രചരിപ്പിക്കുന്ന സൈറ്റുകള്‍ ബ്ലോക്ക് ചെയ്ത് തുടങ്ങിയെന്നും സൈബര്‍ പൊലീസ് അറിയിച്ചു. സൈറ്റില്‍ നിന്ന് ഡൗണ്‍ലോഡ് ചെയ്തവരെയും പൊലീസ് തിരിച്ചറിഞ്ഞിട്ടുണ്ട്. ചിത്രത്തിൻ്റെ അണിയറ പ്രവർത്തകർ ഉടന്‍ പരാതി നല്‍കുമെന്നാണ് വിവരം. പരാതി ലഭിച്ചാല്‍ കർശന നടപടിയുണ്ടാകുമെന്നും സൈബർ പൊലീസ് വ്യക്തമാക്കിയിട്ടുണ്ട്. പൃഥ്വിരാജിന്‍റെ സംവിധാന അരങ്ങേറ്റ ചിത്രമായിരുന്ന 2019 ല്‍ പുറത്തിറങ്ങിയ ലൂസിഫറിന്‍റെ രണ്ടാം ഭാഗമാണ് എമ്ബുരാന്‍.