ലോക്സഭാ തെരഞ്ഞെടുപ്പിന്റെ വോട്ടെണ്ണലിനു മണിക്കൂറുകള് മാത്രം ശേഷിക്കെ തിരുവനന്തപുരത്തെ വോട്ടെണ്ണല് കേന്ദ്രം സന്ദർശിച്ചു ഒരുക്കങ്ങള് വിലയിരുത്തി സംസ്ഥാന മുഖ്യ തെരഞ്ഞെടുപ്പ് ഓഫീസർ സഞ്ജയ് കൗള്. തിരുവനന്തപുരം മാർ ഇവാനിയോസ് കോളജിലെ വോട്ടെണ്ണല് കേന്ദ്രമാണ് മുഖ്യ തെരഞ്ഞെടുപ്പ് ഓഫീസർ സന്ദർശിച്ചത്.
ഒരുക്കങ്ങളെല്ലാം പൂർത്തിയായെന്നും ആദ്യ ഫല സൂചന രാവിലെ ഒൻപത് മണിയോടെ ലഭിക്കുമെന്നും സഞ്ജയ് കൗള് വ്യക്തമാക്കി. നാളെ രാവിലെ എട്ട് മുതല് പോസ്റ്റല് വോട്ടുകള് എണ്ണി തുടങ്ങും. രാവിലെ എട്ടരയോടെ ഇവിഎം വോട്ടുകളും എണ്ണും.
ജില്ലാ കലക്ടർമാരുമായി അവലോകന യോഗം ചേർന്നു ഒരുക്കങ്ങള് വിലയിരുത്തി. എല്ലാം സുതാര്യമായി തന്നെ നടക്കും. വടകരയില് പ്രശ്നമുണ്ടെന്നു കരുതുന്നില്ല. ഇവിഎം വോട്ടുകള് സുതാര്യമാണെന്നും സഞ്ജയ് കൗള് വ്യക്തമാക്കി.
പോസ്റ്റല് വോട്ടുകള് എണ്ണാൻ ഉദ്യോഗസ്ഥർക്ക് മൂന്ന് തവണ പരീശിലനം നല്കിയിട്ടുണ്ട്. സാധാരണ നിലയില് പോസ്റ്റല് ബാലറ്റുകളിലാണ് പ്രശ്നം വരാറുള്ളത്. വോട്ടെണ്ണലിന്റെ റിയല് ടൈം ഡാറ്റ മീഡിയ റൂമുകള് വഴി ലഭിക്കുമെന്നും അദ്ദേഹം കൂട്ടിച്ചേർത്തു.