മുൻ മന്ത്രിയും മുതിർന്ന സിപിഎം നേതാവുമായ ജി. സുധാകരൻ കെപിസിസി വേദിയില്‍ പങ്കെടുക്കും. ഗാന്ധിജി ശിവഗിരിയിലെത്തി ശ്രീനാരായണ ഗുരുവിനെ കണ്ടതിന്‍റെ ശതാബ്ദി ആഘോഷത്തിലാണ് ജി.സുധാകരൻ പങ്കെടുക്കുക. ബുധനാഴ്ച തിരുവനന്തപുരത്ത് വച്ച്‌ നടക്കുന്ന ചടങ്ങില്‍ സുധാകരനെ കൂടാതെ മുൻമന്ത്രിയും സിപിഎം നേതാവുമായ സി. ദിവാകരനും പങ്കെടുക്കും. തിരുവനന്തപുരത്തെ മ‍്യൂസിയം ജംഗ്ഷന് സമീപം സത‍്യൻ സ്മാരക ഹാളില്‍ വൈകിട്ട് 4:30ക്ക് നടക്കുന്ന ചടങ്ങിന്‍റെ ഉദ്ഘാടനം പ്രതിപക്ഷ നേതാവ് വി.ഡി. സതീശൻ നിർവഹിക്കും. സിപിഎം നടപടികളിലെ അതൃപ്തിക്കിടെയാണ് കെപിസിസിയുടെ ക്ഷണം സ്വീകരിച്ചുകൊണ്ട് ജി. സുധാകരൻ പരിപാടിയില്‍ പങ്കെടുക്കാനെത്തുന്നത്. മുൻപ് ആലപ്പുഴയില്‍ വച്ച്‌ നടന്ന ലീഗിന്‍റെ പരിപാടിയിലും സുധാകരൻ പങ്കെടുത്തിരുന്നു.