പാലക്കാട്: അട്ടപ്പാടിയിൽ ഭാര്യയെ വധിക്കാൻ ശ്രമിച്ച ഭർത്താവ് പിടിയിലായി.
കോട്ടമല സ്വദേശി മല്ലീശ്വരനാണു ഭാര്യ രങ്കമ്മയെ കൊലപ്പെടുത്താൻ ശ്രമിച്ചത്.
രാവിലെ ഇരുവരും ചേർന്ന് പശുവിനെ മേയ്ക്കാൻ പോയപ്പോഴായിരുന്നു അപ്രതീക്ഷിത ആക്രമണം.
പശുവിനെ മേയ്ക്കുകയായിരുന്ന രങ്കമ്മയുടെ കഴുത്ത് ഭർത്താവ് അറുക്കുകയായിരുന്നു.
സാരമായി പരിക്കേറ്റ രങ്കമ്മയെ ഉടനെതന്നെ നാട്ടുകാർ ചേർന്ന് കോട്ടത്തറ ട്രൈബൽ സ്പെഷാലിറ്റി ആശുപത്രിയിൽ എത്തിച്ചു.
രങ്കമ്മ ഇപ്പോൾ തീവ്ര പരിചരണ വിഭാഗത്തിൽ ചികിത്സയിലാണ്.
മല്ലീശ്വരൻ മാനസികാസ്വാസ്ഥ്യമുള്ള വ്യക്തിയാണെന്നാണ് ബന്ധുക്കൾ പറയുന്നത്.
ഇതിന് മുന്നേ രണ്ടു തവണ ഇയാൾ സ്വന്തം കഴുത്ത് മുറിച്ചിട്ടുണ്ടെന്നാണ് വിവരം.
പ്രതിയെ അഗളി പോലീസ് കസ്റ്റഡിയിൽ എടുത്തിട്ടുണ്ട്.