ഗരുഡ പ്രീമിയം സര്‍വീസിന് മികച്ച പിന്തുണ ലഭിക്കുന്നുണ്ടെന്ന് കെഎസ്ആർടിസി.
ഗരുഡ പ്രീമിയവുമായി ബന്ധപ്പെട്ട് വരുന്ന ചില വാർത്തകൾ ശരി അല്ല എന്നും ബസ് സർവ്വീസ് ലാഭകരമാണെന്നും കെഎസ്ആർടിസി പറയുന്നു.
മെയ് അഞ്ചിനാണ് കോഴിക്കോട് നിന്നും ബാംഗ്ലൂരിലേക്ക് ഗരുഡ പ്രീമിയം സര്‍വീസ് ആരംഭിച്ചത്.
സർവീസ് ആരംഭിച്ചത് മുതല്‍ 15-ാം തിയ്യതി വരെയുള്ള കാലയളവില്‍ കിലോമീറ്ററിന് ശരാശരി 63.27 രൂപ ഗരുഡ പ്രീമിയം കളക്ഷന്‍ നേടിയതായും കെഎസ്ആർടിസി അറിയിച്ചു.
15-ാം തിയ്യതി വരെയുള്ള കണക്കനുസരിച്ച് പ്രതിദിനം 46,000 രൂപയ്ക്ക് മുകളില്‍ വരുമാനം ബസ്സിൽ നിന്നും ലഭിക്കുന്നുണ്ട്.
450 ല്‍ കൂടുതല്‍ യാത്രക്കാര്‍ ഗരുഡ പ്രീമിയം സര്‍വീസില്‍ യാത്ര ചെയ്തു കഴിഞ്ഞു എന്നും, ബുധനാഴ്ച ഒഴികെയുള്ള ദിവസങ്ങളില്‍ പ്രതിദിനം കിലോമീറ്ററിന് 60.77 രൂപ മുതല്‍ 85.26 രൂപ വരെ കളക്ഷന്‍ നേടാനായിട്ടുണ്ട് എന്നും കെഎസ്ആർടിസി അറിയിച്ചു.
മറ്റുള്ള രീതിയില്‍ വരുന്ന വാര്‍ത്തകള്‍ തികച്ചും വാസ്തവവിരുദ്ധമാണെന്നും കെഎസ്ആർടിസി പറഞ്ഞു.
ബസ്സിന് യാത്രക്കാരുടെ ഭാഗത്തുനിന്നും വലിയ പിന്തുണയും സഹകരണവുമാണ് ലഭിച്ചുകൊണ്ടിരിക്കുന്നത് എന്നും കെഎസ്ആർടിസി കൂട്ടിച്ചേർത്തു.