പുതുപ്പള്ളി സെന്റ് ജോർജ് ഓർത്തഡോക്സ് പള്ളി ഓഡിറ്റോറിയത്തിൽ നടക്കുന്ന കുവൈത്ത് സെന്റ് ഗ്രിഗോറിയോസ് ഇന്ത്യൻ ഓർത്തഡോക്സ് മഹാ ഇടവകയുടെ സപ്തതി സംഗമം 29-ന് രാവിലെ 9.30-ന് സ്പീക്കർ തിരുവഞ്ചൂർ രാധാകൃഷ്ണൻ ഉദ്ഘാടനം ചെയ്യും. അലക്സിയോസ് മാർ യൗസേബിയോസ്, ഡോ. ജോസഫ് മാർ ദീവന്നാസിയോസ്, യൂഹാനോൻ മാർ ദിയസ്കോറോസ്, വൈദിക ട്രസ്റ്റി ഫാ. ഡോ. തോമസ് വർഗീസ് അമയിൽ, അത്മായ ട്രസ്റ്റി റോണി വർഗീസ് ഏബ്രഹാം, സഭാ സെക്രട്ടറി ബിജു ഉമ്മൻ, എം.എൽ.എമാരായ ചാണ്ടി ഉമ്മൻ, അബിൻ വർക്കി, റെജി ചെറിയാൻ തുടങ്ങിയവർ ചടങ്ങിൽ പങ്കെടുക്കും. കീസ് ബാൻഡ് അവതരിപ്പിക്കുന്ന ക്രൈസ്തവ ഭക്തിഗാന ഭജനയും ചടങ്ങിന്റെ ഭാഗമായി നടക്കും. ഒരു വർഷം നീളുന്ന ആത്മീയ, സാംസ്കാരിക, സാമൂഹിക പരിപാടികൾക്ക് ഈ സംഗമത്തോടെ തുടക്കമാകും. സപ്തതി ആഘോഷങ്ങളുടെ സമാപനം അടുത്ത വർഷം ജനുവരിയിൽ നടക്കുമെന്ന് വികാരി ഫാ. ഡോ. ബിജു ജോർജ് പാറയ്ക്കലും, ജനറൽ കൺവീനർ മാത്യൂസ് വർഗീസും അറിയിച്ചു.