കരിപ്പൂർ വിമാനത്താവളത്തിൽ വൻ സ്വർണ്ണവേട്ട: എട്ട് മാസം പ്രായമുള്ള കുഞ്ഞിന്റെ ഡയപ്പറിൽ ഒളിപ്പിച്ചു കടത്താൻ ശ്രമിച്ച ഒരു കോടി രൂപയുടെ സ്വർണം പിടികൂടി.റാസൽ ഖൈമയിൽ നിന്നും കരിപ്പൂർ അന്താരാഷ്ട്ര വിമാനത്താവളത്തിൽ എത്തിയ പൊന്നാനി സ്വദേശിയുടെ എട്ട് മാസം പ്രായമുള്ള കുഞ്ഞിന്റെ ഡയപ്പറിനുള്ളിൽ ഒളിപ്പിച്ചു കടത്താൻ ശ്രമിച്ച ഏകദേശം ഒരു കോടി രൂപ വിലമതിക്കുന്ന സ്വർണ്ണമാണ് ഡയറക്ടറേറ്റ് ഓഫ് റവന്യൂ ഇൻ്റലിജൻസ് (DRI) സംഘം പിടികൂടിയത്. കുഞ്ഞുമായി എത്തുന്ന യാത്രക്കാരെ സാധാരണയായി കസ്റ്റംസ് അധികൃതർ വിശദമായ പരിശോധനകളിൽ നിന്ന് ഒഴിവാക്കാറുള്ള പഴുത് മുതലെടുത്ത് സ്വർണ്ണം കടത്താനായിരുന്നു പ്രതിയുടെ ശ്രമം. രഹസ്യവിവരത്തിന്റെ അടിസ്ഥാനത്തിൽ വിമാനത്താവളത്തിൽ വെച്ച് നടത്തിയ പരിശോധനയിലാണ് കുട്ടിയുടെ ഡയപ്പറിനുള്ളിൽ നിന്നും, കുട്ടിയുടെ പിതാവിന്റെ ശരീരത്തിൽ മിശ്രിത രൂപത്തിൽ ഒട്ടിച്ചുവെച്ച നിലയിലുമായിരുന്ന വൻ സ്വർണ്ണ ശേഖരം കണ്ടെടുത്തത്. സംഭവവുമായി ബന്ധപ്പെട്ട് പിതാവിനെ ഡിആർഐ കസ്റ്റഡിയിലെടുത്ത് അന്വേഷണം നടത്തിവരുന്നു.