പാലക്കാട് തച്ചനാട്ടുകരയിൽ കുടുംബപ്രശ്നങ്ങളെ തുടർന്ന് മകനെയുമെടുത്ത് യുവതി കിണറ്റിൽ ചാടിയ സംഭവത്തിൽ, ചികിത്സയിലായിരുന്ന രണ്ടര വയസുകാരൻ മരണത്തിന് കീഴടങ്ങി. തച്ചനാട്ടുകര സ്വദേശി കാഞ്ചനയാണ് വെള്ളിയാഴ്ച രാത്രി മകൻ വേദിക് (കാശി)നെയും എടുത്ത് വീട്ടിലെ കിണറ്റിൽ ആത്മഹത്യക്ക് ശ്രമിച്ചത്.രാത്രി ശക്തമായ മഴയും കാറ്റും മൂലം വൈദ്യുതി വിച്ഛേദിക്കപ്പെട്ട സമയത്താണ് സംഭവം. വീട്ടുകാർ കാഞ്ചനയെ സമീപത്തെ വീടുകളിൽ അന്വേഷിച്ചെങ്കിലും കണ്ടെത്താനായില്ല. തിരച്ചിലിനിടെ കിണറിന്റെ പൈപ്പ് ഇളകുന്നത് ശ്രദ്ധയിൽപ്പെട്ടതിനെ തുടർന്ന് നോക്കിയപ്പോൾ ഇരുവരെയും കണ്ടെത്തി. ഉടൻ നാട്ടുകാരും ഫയർഫോഴ്സും പൊലീസും ചേർന്ന് രക്ഷാപ്രവർത്തനം നടത്തി ഇരുവരെയും കരകയറ്റി ആശുപത്രിയിലെത്തിച്ചു.എന്നാൽ, അത്യാസന്ന നിലയിലായിരുന്ന കാശി ശനിയാഴ്ച രാവിലെ മരണത്തിന് കീഴടങ്ങി. കാഞ്ചന നിലവിൽ ആശുപത്രിയിൽ ചികിത്സയിൽ തുടരുകയാണ്.