പത്തനാപുരം എൻ.എസ്.എസ് താലൂക്ക് യൂണിയൻ ഭരണസമിതി പിരിച്ചു വിട്ടത് ഭൂരിപക്ഷം നഷ്ടപ്പെട്ടതിനാലെന്ന് എൻ.എസ്.എസ്. ജനറൽ സെക്രട്ടറി ജി.സുകുമാരൻനായർ.യൂണിയൻ പ്രസിഡന്റും മന്ത്രിയുമായ കെ.ബി.ഗണേഷ്കുമാറിന്റെ ഏകാധിപത്യപ്രവണതകളിൽ പ്രതിഷേധിച്ചാണ് ഭരണസമിതിയിലെ 11 പേർ രാജിക്കത്ത് നൽകിയത്.ഇതിൽ രണ്ടുപേർ രാജികത്ത് പിൻവലിച്ചതായി യൂണിയൻ സെക്രട്ടറിക്ക് കത്ത് നൽകി.ഇത് സമ്മർദ്ദങ്ങളെ തുടർന്നായിരുന്നു. അടുത്തദിവസം യൂണിയൻ ഭരണസമിതിയംഗങ്ങളിൽ ഭൂരിപക്ഷം അംഗങ്ങളും എൻ.എസ്.എസ്. ആസ്ഥാനത്തെത്തി യൂണിയൻ പ്രസിഡന്റിന്റെ ഏകാധിപത്യപ്രവണതകളിലുള്ള എതിർപ്പറിയിക്കുകയായിരുന്നു.ഇതിനെ തുടർന്നാണ് സംഘടനാവിഭാഗം മേധാവി യൂണിയൻ കമ്മിറ്റി പിരിച്ചുവിട്ട് താല്ക്കാലിക കമ്മിറ്റിക്ക് ചുമതല നൽകിയത്.കെ.ബി.ഗണേഷ് കുമാർ മാധ്യമങ്ങളോട് നടത്തിയ പ്രതികരണത്തെകുറിച്ച് അറിയില്ല. നായർ സർവ്വീസ് സൊസൈറ്റിയുടെ ഭരണഘടനാപരമായ നടപടിമാത്രമാണ് ചെയ്തത്. അല്ലാത്ത ഒരു നടപടിയും എടുത്തിട്ടില്ലെന്നും ജി.സുകുമാരൻനായർ പറഞ്ഞു.