ചിലരൊക്കെ പറയാറുണ്ട്, സ്വപ്നം കാണാറേയില്ലെന്ന്.
എന്നാല്‍ അത് സത്യമല്ല, എല്ലാവരും സ്വപ്നം കാണാറുണ്ടെന്നാണ് ശാസ്ത്രജ്ഞര്‍ പറയുന്നത്.
പക്ഷെ ഇതില്‍ 60 ശതമാനം പേരും ഉണര്‍ന്നു കഴിഞ്ഞശേഷം തങ്ങളുടെ സ്വപ്നം ഓര്‍ക്കാറില്ലെന്നു മാത്രം.
സ്വപ്നം കാണുന്നതിന്‍റെ കാരണം എന്താണെന്ന് കൃത്യമായി കണ്ടുപിടിക്കാന്‍ ഗവേഷകര്‍ക്ക് കഴിഞ്ഞിട്ടില്ല.
ഉറങ്ങുമ്പോള്‍ തലച്ചോറില്‍ നാലു തരം തരംഗങ്ങളാണ് ഉണ്ടാകുന്നത്.
ഡെല്‍റ്റാ, തീറ്റാ, ആല്‍ഫാ, ബീറ്റാ എന്നിങ്ങനെയാണ് അവയ്ക്ക് പേരു നല്‍കിയിരിക്കുന്നത്.
ഇതില്‍ ആല്‍ഫാ തരംഗങ്ങളാണ് സ്വപ്നവുമായി ബന്ധപ്പെട്ടിരിക്കുന്നത്.
മിക്ക സ്വപ്നങ്ങളും 5 മുതല്‍ 20 മിനിറ്റു വരെ നീണ്ടുനില്‍ക്കും.
കൂര്‍ക്കം വലിക്കുന്ന സമയത്ത് സ്വപ്നം കാണാറില്ല.
ഒരാള്‍ ഒരു രാത്രിയില്‍ തന്നെ ഏഴു വ്യത്യസ്ത സ്വപ്നങ്ങള്‍ വരെ കാണാനുള്ള സാദ്ധ്യതയുമുണ്ട്.
സ്വപ്നം കണ്ടുതീര്‍ന്ന് 5 മിനിറ്റ് കഴിഞ്ഞാല്‍ സ്വപ്നത്തിന്‍റെ അമ്പതു ശതമാനം നമ്മള്‍ മറക്കും.
പത്തു മിനിറ്റു കഴിഞ്ഞാലോ?
സ്വപ്നത്തിന്‍റെ 90 ശതമാനവും മറക്കും.
ദൈനംദിനകാര്യങ്ങളില്‍ നമുക്കിത്ര മറവിയുണ്ടാകാറില്ലല്ലോ, അല്ലേ?
അതുകൊണ്ടുതന്നെ സ്വപ്നങ്ങള്‍ക്ക് അത്ര പ്രാധാന്യം കൊടുക്കേണ്ടതില്ലെന്നാണ് ഗവേഷകര്‍ അഭിപ്രായപ്പെടുന്നത്.