മധ്യ തിരുവിതാംകൂറിലെ പ്രാചീന വ്യാപാര വാണിജ്യ മേളയായ മല്ലപ്പള്ളി തെള്ളിയൂർക്കാവ് വൃശ്ചിക വാണിഭത്തിന് ശനിയാഴ്ച തുടക്കമാകും. രാവിലെ 8.30ന് ചരൽക്കുന്ന് മയിലാടും പാറ മഹാദേവർ ക്ഷേത്രത്തിൽ നിന്ന് നവ ധാന്യഘോഷയാത്ര തെള്ളിയൂർക്കാവ് ഭഗവതി ക്ഷേത്രത്തിൽ എത്തിച്ചേരും. പ്രസിഡന്റ്‌ സി എസ് അനീഷ്‌കുമാർ,സെക്രട്ടറി കെ ആർ രതീഷ് എന്നിവരുടെ നേതൃത്വത്തിലാണ് ധാന്യം എഴുന്നള്ളത്ത്‌ എത്തുന്നത്.
തുടർന്ന് രാവിലെ 9ന് കൊടിമരചുവട്ടിലെ വെള്ളി പരമ്പിൽ കേരള പുലയർ മഹാസഭ സംസ്ഥാന സെക്രട്ടറി തുറവൂർ സുരേഷ് ധാന്യസമർപ്പണം നടത്തും.വൃശ്ചിക വാണിഭമേളയുടെ ഉത്ഘാടനം കർഷകശ്രീ അവാർഡ് ജേതാവായ നടൻ കൃഷ്ണപ്രസാദ് നിർവഹിക്കും.പാരമ്പര്യ അവകാശികൾ കരിംകോഴിയെ പറത്തലും വിളിച്ചു ചൊല്ലി പ്രാർഥനയും നടത്തും.മേൽശാന്തി മനോജ്‌ നാരായണൻ നമ്പൂതിരി ഭദ്രദീപം പകരും.ഉപദേശക സമിതി പ്രസിഡന്റ്‌ പി ജി സതീഷ് കുമാറിന്റെ അധ്യക്ഷതയിൽ ചേരുന്ന ചടങ്ങിൽ സെക്രട്ടറി അഖിൽ എസ് നായർ, ദേവസ്വം സബ്ഗ്രൂപ്പ് ഓഫീസർ കെ വന്ദന,വാർഡ് മെമ്പർ ശ്രീജാ ടി നായർ തുടങ്ങിയവർ പങ്കെടുക്കും.41ദിവസം നീണ്ടുനിൽക്കുന്ന കളമെഴുതി പാട്ടിനും ക്ഷേത്രത്തിൽ ഇതോടെ തുടക്കമാകും.
ഡിസംബർ ഒന്ന് വരെ നടക്കുന്ന മേള ഇത്തവണ തിരുവിതാംകൂർ ദേവസ്വം ബോർഡിന്റെ ചുമതലയിലാണ് നടത്തുന്നത്.ക്ഷേത്രപ്രവേശന വിളംബരത്തിനു മുമ്പ് തുടക്കം കുറിച്ച ആചാരമാണ് മേളയായി പരിണമിച്ചത്. ക്ഷേത്ര പ്രവേശനം നിഷേധിക്കപ്പെട്ട ഹൈന്ദവ സമൂഹം വൃശ്ചികം ഒന്നിന് ക്ഷേത്രത്തിന് മുന്നിലെ ആൽമരചുവട്ടിൽ പണി ആയുധങ്ങൾ, കാർഷിക വിഭവങ്ങൾ, എന്നിവ എല്ലാം കാഴ്ച വച്ചു. അരയ സമൂഹം ഉണക്ക സ്രാവിനെയാണ് എത്തിച്ചത്. ഇത് ലേലം ചെയ്തു വാങ്ങാൻ നിരവധി ആളുകൾ എത്തിയതോടെ ക്ഷേത്രാചാരം വലിയ വ്യാപാര മേളയായി മാറി.. ഉണക്ക സ്രാവ് ഇന്നും മേളയിൽ പ്രാധാനഇനം തന്നെ.കാർഷിക ഉത്പന്നങ്ങൾ, പണി ആയുധങ്ങൾ, ഫർണീച്ചർ, കല്ല് കൊണ്ടുള്ള അടുക്കള ഉപകരണങ്ങൾ, വസ്ത്രം, ചെരുപ്പ്, പൂച്ചെടികൾ അടക്കം ഉപ്പ് തൊട്ട് കർപ്പൂരം വരെ മേളയിൽ ലഭ്യമാണ്.