ഇന്ത്യ-യുഎസ് വ്യാപാരക്കരാറിന് ധാരണയായതായി യുഎസ് പ്രസിഡൻ്റ് ഡോണൾഡ് ട്രംപ്.ഇന്ത്യയ്ക്കു ചുമത്തിയ പകരംതീരുവ 18% ആക്കി കുറച്ചതായി ഇന്നലെ രാത്രി ട്രംപ് സമൂഹമാധ്യമത്തിലൂടെ അറിയിച്ചു. പ്രധാന മന്ത്രി നരേന്ദ്ര മോദിയുമായുള്ള ഫോൺ സംഭാഷണത്തിനു പിന്നാലെയായിരുന്നു ഏകപക്ഷീയ പ്രഖ്യാപനം. തൊട്ടുപിന്നാലെ, തീ രുവ കുറച്ചതിനു മോദി സമൂഹമാധ്യമ പോസ്റ്റിൽ നന്ദി പറഞ്ഞു.വ്യാപാരക്കരാറിൽ ധാരണയായെന്ന് വാണിജ്യമന്ത്രി പീയൂഷ് ഗോയൽ സ്‌ഥിരീകരിച്ചു.25% പകരം തീരുവയ്ക്കു പുറമേ റഷ്യൻ എണ്ണ വാങ്ങുന്നതിനു യുഎസ് ചുമത്തിയ 25% അധികംതീരുവയും ചേർത്ത് ആകെ 50% തീരുവയാണ് ഓഗസ്റ്റിൽ ഇന്ത്യയ്ക്കു ചുമത്തിയിരുന്നത്.ഇത് 18 ശതമാനമായി കുറയുമെന്നു യുഎസ് എംബസി വക്ത‌ാവ് അറിയിച്ചു. ഫലത്തിൽ റഷ്യൻ എണ്ണ വാങ്ങുന്നതിന്റെ പേരിൽ ചുമത്തിയ 25% തീരുവ പൂർണമായും ഒഴിവായി. റഷ്യൻ എണ്ണ വാങ്ങുന്നത് അവസാനിപ്പിക്കാമെന്നും, പകരം കൂടുതൽ എണ്ണ യുഎസിൽനിന്നും വെനസ്വേലയിൽനിന്നും വാങ്ങാമെന്നും മോദി ഉറപ്പുനൽകിയതായി ട്രംപ് പറഞ്ഞു.