കല്യാണം ക്ഷണിക്കാനായി പോയ 60 കാരന് കിണറ്റിൽ വീണ് പരിക്ക് . ശ്രീകണ്ഠാപുരം വെമ്പുവയലിലെ കോയാടൻ രാജനാണ് പയ്യാവൂരിലെ കിണറ്റിൽ വീണത്. ഇയാളുടെ കൈക്ക് പരിക്കേറ്റു. കല്യാണം ക്ഷണിക്കാൻ പോയ വീട്ടിലെ നായ കുരച്ചുചാടിയപ്പോൾ പേടിച്ച് കാൽവഴുതി അടുത്തുള്ള കിണറ്റിലേക്ക് വീഴുകയായിരുന്നു. ആൾമറയുള്ള കിണറായിരുന്നുവെങ്കിലും നായ കുരച്ച് ചാടിയപ്പോൾ അബദ്ധത്തിൽ കാൽ വഴുതുകയായിരുന്നു.കിണറ്റിൽ നാലടിയോളം വെള്ളമുണ്ടായിരുന്നു. പയ്യാവൂർ പോലീസും സ്ഥലത്തുണ്ടായിരുന്ന കെഎസ്ഇബി ഉദ്യോഗസ്ഥരും നാട്ടുകാരും ചേർന്ന് രക്ഷിക്കാൻ ശ്രമിച്ചെങ്കിലും നടന്നില്ല. പിന്നീട് ഇരിട്ടിയിൽ നിന്നെത്തിയ അഗ്നി രക്ഷാസേനാ ഉദ്യോഗസ്ഥരാണ് കയർ കിണറ്റിലിറക്കി രാജനെ പുറത്തെത്തിച്ചത്. പ്രാഥമിക ശുശ്രൂഷയ്ക്ക് ശേഷം രാജനെ പയ്യാവൂരിലെ സ്വകാര്യ ആശുപത്രിയിൽ പ്രവേശിപ്പിച്ചു.