കോഴിക്കോട് താമരശ്ശേരിയിൽ പ്രായപൂർത്തിയാകാത്ത പെൺകുട്ടിയുടെ മുറിയിൽ അതിക്രമിച്ച് കയറിയ യുവാവിനെതിരെ കേസെടുത്ത് പോലീസ്.സംഭവത്തിൽ അടിവാരം വള്ളിയാട് സ്വദേശി മിഷ്ബാഹുൽ (19) നെതിരെയാണ് പോലീസ് കേസെടുത്തത്.ഇയാൾക്കെതിരെ പോക്സോ ഉൾപ്പെടെയുള്ള വകുപ്പുകളാണ് ചേർത്തിരിക്കുന്നത്.ഇന്നലെ അർധരാത്രിയായിരുന്നു യുവാവ് പെൺകുട്ടിയുടെ മുറിയിൽ അതിക്രമിച്ച് കടന്നത്.കഴിഞ്ഞ ഒന്നര വർഷമായി പെൺകുട്ടിയും യുവാവും പരിചയക്കാരാണ്ഈ പരിചയം വെച്ചാണ് ഇയാൾ പെൺകുട്ടിയുടെ മുറിയിലേക്ക് അതിക്രമിച്ച് കടന്നത്.ശബ്ദം കേട്ട് എത്തിയ കുട്ടിയുടെ വീട്ടുകാർ യുവാവിനെ മുറിയിൽ പൂട്ടിയിട്ടു.വീട്ടുകാർ മുറിയിൽ പൂട്ടിയിട്ടതിന് പിന്നാലെ യുവാവ് തന്റെ സുഹൃത്തുക്കളെ സ്ഥലത്തേക്ക് വിളിച്ചു വരുത്തുകയായിരുന്നു.സ്ഥലത്തെത്തിയ മൂന്നംഗ സംഘം വീട്ടിൽ ഭീകരാന്തരീക്ഷം സൃഷ്ടിക്കുകയും അക്രമണം അഴിച്ചുവിടുകയും ചെയ്തു.വീട്ടിലുണ്ടായിരുന്ന പെൺകുട്ടിയുടെ അമ്മയുടെ സഹോദരനെ കമ്പിവടി ഉപയോഗിച്ച് സംഘം ആക്രമിച്ചു.ഇത് തടയാനെത്തിയ പെൺകുട്ടിയുടെ പിതാവിനെയും പ്രതികൾ ആക്രമിച്ചു.പെൺകുട്ടിയുടെ അമ്മയെയും ഇവർ ഉപദ്രവിക്കുകയും, വസ്ത്രം വലിച്ച് കീറുകയും ചെയ്തു.പെൺകുട്ടിയുടെ സഹോദരനെയും പ്രതികൾ ആക്രമിച്ചു.ശേഷം വീട് അടിച്ചു പൊളിക്കുകയും ചെയ്തു.പൂട്ടിയിട്ട യുവാവിനെ സംഘം ബലം പ്രയോഗിച്ച് വീട്ടിൽ നിന്നും കൊണ്ടുപോകുകയും ചെയ്തു.മൂന്നംഗ സംഘത്തെ പോലീസ് ഇന്നുപുലർച്ചെ അറസ്റ്റ് ചെയ്തു.ഇവർക്കെതിരെ പോക്സോ കേസും വീട്ടിൽ അതിക്രമിച്ച് കടന്നതിനുൾപ്പെടെയും കേസെടുത്തു.പെൺകുട്ടിയുടെ സുഹൃത്തായ യുവാവിനെ ഉടൻ തന്നെ അറസ്റ്റ് ചെയ്യുമെന്നും പോലീസ് അറിയിച്ചു.