മാസപ്പടി കേസുമായി ബന്ധപ്പെട്ട് ഡയറിയിൽ പരാമർശിച്ചിരിക്കുന്ന പേരിനെക്കുറിച്ച് തനിക്ക് യാതൊരു അറിവുമില്ലെന്ന് മുൻ മന്ത്രി ജി. സുധാകരൻ വ്യക്തമാക്കി. കേസിന്റെ ഗൗരവം നശിപ്പിക്കാനായി അനാവശ്യ പേരുകൾ ബോധപൂർവം എഴുതിച്ചേർക്കുകയാണെന്നും, തന്നെപ്പറ്റി പി.സി. ജോർജിന് പോലും മോശം അഭിപ്രായമില്ലെന്നും എന്നാൽ ഷോണിന്റെ നടപടികൾ അതിരുകടന്നതാണെന്നും (ഓവറാണെന്നും) അദ്ദേഹം കുറ്റപ്പെടുത്തി. ലിസ്റ്റ് പുറത്തുവിട്ടയാൾക്ക് മാന്യതയുണ്ടെങ്കിലല്ലേ മാനനഷ്ടത്തിന് കേസ് കൊടുക്കേണ്ടതുള്ളൂവെന്നും ജി. സുധാകരൻ കൂട്ടിച്ചേർത്തു. കരിമണൽ ഖനന അനുമതിക്കായി കർത്ത തന്നെ വന്നു കണ്ടിരുന്നെങ്കിലും അത് അനുവദിക്കില്ലെന്ന് വ്യക്തമാക്കിയതാണെന്നും, പാർട്ടിക്ക് ഫണ്ട് നൽകാമെന്ന് വാഗ്ദാനം ചെയ്തെങ്കിലും താൻ അത് നിരസിക്കുകയായിരുന്നുവെന്നും അദ്ദേഹം വെളിപ്പെടുത്തി.