തിരുവനന്തപുരം: കോൺഗ്രസിന്റെ കേരളത്തിലെ ലോക്‌സഭാ സ്ഥാനാർത്ഥികളെ ഇന്ന് പ്രഖ്യാപിക്കും. കെ മുരളീധരനെ തൃശ്ശൂർ മണ്ഡലത്തിലേക്ക് മാറ്റിയാണ് കോൺഗ്രസിന്റെ സർപ്രൈസ് സ്ഥാനാർത്ഥി പട്ടിക പുറത്തുവരിക. പത്മജ പോയ ക്ഷീണം തീർക്കാനുള്ള നെട്ടോട്ടത്തിലാണ കോൺഗ്രസ്.
വടകരയിൽ ഷാഫി പറമ്പിലും ആലപ്പുഴയിൽ കെ സി വേണുഗോപാലും സ്ഥാനാർത്ഥികളാകും. കണ്ണൂരിൽ കെ സുധാകരൻ തന്നെ മത്സരിക്കുമെന്നാണ് അറിയുന്നത്.
പത്മജ വേണുഗോപാൽ ബി ജെ പിയിൽ ചേർന്ന് പാർട്ടിക്കുണ്ടാക്കിയ ക്ഷീണം, മുരളീധരനെ ഇറക്കി കരുണാകരന്റെ തട്ടകത്തിൽ പരിഹരിക്കാനാണ് കോൺഗ്രസ് ശ്രമിക്കുന്നത്. മുരളിക്കു പകരം വടകരയിൽ കെ കെ ശൈലജയെ നേരിടാൻ ഷാഫി പറമ്പിലിനാണ് നിയോഗം. ടി സിദ്ദിഖിന്റെ പേരും പരിഗണിച്ചിരുന്നു. വയനാട്ടിൽ രാഹുൽ ഗാന്ധി തന്നെ . സിറ്റിംഗ് എംപിമാർ എല്ലാവരും തുടരും. തിരുവനന്തപുരത്ത് ശശി തരൂർ, ആറ്റിങ്ങലിൽ അടൂർ പ്രകാശ്, പത്തനംതിട്ടയിൽ ആന്റോ ആന്റണി, മാവേലിക്കരയിൽ കൊടിക്കുന്നിൽ സുരേഷ്, എറണാകുളത്ത് ഹൈബി ഈഡൻ, ഇടുക്കിയിൽ ഡീൻ കുര്യാക്കോസ്, ചാലക്കുടിയിൽ ബെന്നി ബഹനാൻ, പാലക്കാട് വികെ ശ്രീകണ്ഠൻ, ആലത്തൂരിൽ രമ്യ ഹരിദാസ്, കോഴിക്കോട് എംകെ രാഘവൻ, കാസർകോട്ട് രാജ്‌മോഹൻ ഉണ്ണിത്താൻ എന്നീ സിറ്റിംഗ് എംപിമാർ വീണ്ടും മത്സരിക്കും. പുതുമയില്ലാത്ത ഒരു പട്ടിക പുതിയ രാഷ്ട്രീയ സാഹചര്യത്തിൽ ഗുണം ചെയ്യില്ലെന്ന നേതൃത്വത്തിൽ ചിന്തയാണ് സർപ്രൈസ് സ്ഥാനാർത്ഥത്തിന് കാരണം. ടി എൻ പ്രതാപന് വരുന്ന നിയമസഭ തെരഞ്ഞെടുപ്പിൽ സീറ്റ് നൽകുമെന്ന് ഉറപ്പുകൊടുത്തിട്ടുണ്ട്. പ്രതാപൻ തിരഞ്ഞെടുപ്പ് പ്രചരണത്തിൽ മുഴുകിയപ്പോഴാണ് ഈ തിരിച്ചടി വരുന്നത്. പാർട്ടി പറഞ്ഞാൽ എന്തും അനുസരിക്കുമെന്ന് പ്രതാപൻ പ്രതികരിച്ചു. പ്രതാപനു വേണ്ടി എഴുതിയ ചുവരുകളിൽ എല്ലാം വെള്ളയടിച്ച് ഇനി കെ മുരളീധരൻ എന്ന് എഴുതേണ്ടിവരും.