കൊച്ചിയിൽ ഐസ് മെത്ത് എന്ന് വിളിക്കുന്ന മാരക മയക്കുമരുന്നുമായി രണ്ടു പേർ പിടിയിലായി.
ആലുവ ചൂർണ്ണിക്കര സ്വദേശി അക്ഷയ് വി എസ് (27) ഏലൂർ മഞ്ഞുമ്മൽ സ്വദേശി ഷബിൻ ഷാജി (26 ), എന്നിവരാണ് പിടിയിലായത്.
ഇവരുടെ പക്കൽ നിന്നും 10 ഗ്രാം മെത്താംഫിറ്റാമിനാണ് കണ്ടെടുത്തത്.
അർദ്ധരാത്രിയിൽ പ്രതികൾക്ക് ഏറെ സ്വാധീനമുള്ള മഞ്ഞുമ്മൽ കടവ് റോഡിൽ വെച്ചാണ് മയക്കുമരുന്ന് കൈമാറിയിരുന്നത്.
എക്സൈസ് ഇന്റലിജൻസ്, വരാപ്പുഴ റേഞ്ച്, സ്റ്റേറ്റ് എക്സൈസ് എൻഫോഴ്സ്മെന്റ് സ്ക്വാഡ് എന്നിവരുടെ സംയുക്ത നീക്കത്തിലാണ് പ്രതികളെ പിടികൂടിയത്.
പുലർച്ചെ ഒരു മണിയോടെ മഞ്ഞുമ്മൽ കടവ് ഭാഗത്ത് മയക്കുമരുന്ന് കൈമാറാൻ എത്തിയപ്പോഴാണ് രണ്ടുപേരും പിടിയിൽ ആകുന്നത്.
ഷബിൻ ഷാജി കൈവശം ഉണ്ടായിരുന്ന മയക്കുമരുന്ന് വിഴുങ്ങാൻ ശ്രമിച്ചത് പരിഭ്രാന്തി സൃഷ്ടിച്ചുവെങ്കിലും ഉദ്യോഗസ്ഥരുടെ സമയോചിതമായ ഇടപെടൽ മൂലം അത് നടന്നില്ലെന്നും എക്സൈസ് പറഞ്ഞു.
പിടിയിലായ ഇരുവരും നേരത്തെയും വരാപ്പുഴ എക്സൈസ് റേഞ്ചിൽ മയക്കുമരുന്ന് കേസിൽ പ്രതികളാണ്.