കോഴിക്കോട് : മെഡിക്കൽ കോളേജ് ആശുപത്രിയിൽ കഴിഞ്ഞ ദിവസം മരിച്ച അഞ്ചു വയസ്സുകാരിയുടെത് അമീബിക് മസ്തിഷ്ക ജ്വരം മൂലമാണെന്ന് സ്ഥിരീകരണം.
ഇന്നലെ ലഭിച്ച പോണ്ടിച്ചേരി ജിപ്മർ ഇൻസ്റ്റിട്യൂറ്റിൽ നിന്നുള്ള പി.സി.ആർ പരിശോധനയിലാണ് കുട്ടിക്ക് രോഗം സ്ഥിരീകരിച്ചതെന്ന് മെഡിക്കൽ കോളേജ് മൈക്രോബയോളജി വിഭാഗം അറിയിച്ചു.
മെയ് 13 മുതൽ രോഗലക്ഷണങ്ങളുമായി മെഡിക്കൽ കോളേജ് ആശുപത്രി തീവ്രപരിചരണ വിഭാഗത്തിൽ ചികിത്സയിലായിരുന്നു മലപ്പുറം മുന്നിയൂർ സ്വദേശിയായ ഫദ്‌വ എന്ന 5 വയസ്സുകാരി.
നട്ടെല്ലിൽ നിന്നുള്ള സ്രവ പരിശോധന മെഡിക്കൽ കോളേജിൽ നടത്തിയിരുന്നെങ്കിലും സ്ഥിരീകരിക്കാൻ ആണ് പി.സി.ആർ പരിശോധന നടത്തിയത്.
അതേസമയം ആശുപത്രിയിൽ നിരീക്ഷണത്തിലുണ്ടായിരുന്ന മറ്റ് നാല് കുട്ടികളും ഇന്നലെ ആശുപത്രി വിട്ടു.