മഞ്ഞിനിക്കര ദയറായില്‍ കബറടങ്ങിയിരിക്കുന്ന പ. മോര്‍ ഇഗ്നാത്തിയോസ് ഏലിയാസ് ത്രിതീയന്‍ ബാവായുടെ 93-ാമത് ദു:ഖ്‌റോനോ പെരുന്നാള്‍ 2025 ഫെബ്രുവരി 2 മുതല്‍ 8 വരെ മഞ്ഞിനിക്കര ദയറായില്‍ നടക്കും . ഈ വര്‍ഷത്തെ പെരുന്നാളിന് പരിശുദ്ധ പാത്രിയര്‍ക്കീസ് ബാവായുടെ ശ്ലൈഹിക പ്രതിനിധി ലബാനോനിലെ സിറിയന്‍ ഓര്‍ത്തഡോക്‌സ് പാട്രിയാര്‍ക്കേറ്റിലെ സുറിയാനി പഠന വിഭാഗത്തിന്റെ പാത്രിയര്‍ക്കാ വികാരിയും പാത്രിയാര്‍ക്കീസ് ബാവായുടെ പ്രത്യേക സ്ഥാനാപതിയുമായ മോര്‍ സേവേറിയോസ് റോജര്‍ അക്രാസ് മെത്രാപ്പോലീത്ത, മലങ്കര മെത്രപ്പോലീത്തായും, എപ്പിസ്‌കോപ്പല്‍ സുന്നഹദോസിന്റെ പ്രസിഡന്റുമായ മോര്‍ ഗ്രീഗോറിയോസ് ജോസഫ്, സഭയിലെ എല്ലാ അഭിവന്ദ്യ തിരുമേനിമാരും ആരോഗ്യ, വനിതാ, ശിശുക്ഷേമ വകുപ്പ് മന്ത്രി വീണാ ജോര്‍ജ്ജും മറ്റ് രാഷ്ട്രീയ സാമൂഹ്യ നേതാക്കളും സംബന്ധിക്കും.
ഫെബ്രുവരി 2-ാം തീയതി മഞ്ഞിനിക്കര ദയറായുടെ തലവനും ദക്ഷിണ മേഖല സിംഹാസന പള്ളികളുടെ മെത്രാപ്പോലീത്തായുമായ മോര്‍ അത്താനാസിയോസ് ഗീവര്‍ഗ്ഗീസ്, കൊല്ലം ഭദ്രാസനത്തിന്റെ അഭിവന്ദ്യ തേവോദോസ്യോസ് മാത്യുസ്, ക്‌നാനായ ഭദ്രാസനത്തിന്റെ മോർ ഗ്രീഗോറിയോസ് കുര്യാക്കോസ് എന്നീ അഭിവന്ദ്യ തിരുമേനിമാരുടെ കാര്‍മ്മികത്വത്തില്‍ രാവിലെ 8 മണിക്ക് ആരംഭിക്കുന്ന വിശുദ്ധ മൂന്നിന്മേല് കുര്‍ബ്ബാനയ്ക്ക് ശേഷം മഞ്ഞിനിക്കര ദയറായിലും യാക്കോബായ സുറിയാനി സഭയിലെ എല്ലാ പള്ളികളിലും പാത്രിയര്‍ക്കാ പതാക ഉയര്‍ത്തും
വൈകിട്ട് 5.30 ന് വിശുദ്ധ മോറാന്റെ കബറിടത്തില്‍ നിന്നും ഭക്തിനിര്‍ഭരമായി കൊണ്ടുപോകുന്ന പതാക 6 മണിക്ക് ഓമല്ലൂര്‍ കുരിശിന്‍തൊട്ടിയില്‍ മോര്‍ അത്താനാസിയോസ് ഗീവര്‍ഗീസ് ഉയര്‍ത്തും.
ഫെബ്രുവരി 3-ാം തീയതി മുതല്‍ എല്ലാ ദിവസവും രാവിലെ 5 മണിക്ക് പ്രഭാത നമസ്‌ക്കാരവും 7.30 ന് വിശുദ്ധ കുര്‍ബാനയും 12.30 ന് ഉച്ച നമസ്‌ക്കാരവും വൈകിട്ട് 5 മണിക്ക് സ ന്ധ്യാ നമസ്‌ക്കാരവും ഉണ്ടായിരിക്കും. 3-ാം തീയതി വൈകിട്ട് 6.30 ന് ഗാന ശുശ്രുഷയും 7 മണിക്ക് തുമ്പമണ്‍ ഭദ്രാസനത്തിന്റെ മോര്‍ മിലിത്തിയോസ് യൂഹാനോന്‍ മെത്രാപ്പോലീത്ത കണ്‍വന്‍ഷന്‍ ഉദ്ഘാടനം ചെയ്യുന്നതും തുടര്‍ന്ന് റവ. ഫാ. മാത്യൂസ് തോക്കുപാറ പ്രസംഗിക്കുന്നതുമാണ്.
ഫെബ്രുവരി 4-ാം തീയതി ചൊവ്വാഴ്ച രാവിലെ 9.30 ന് തുമ്പമണ്‍ ഭദ്രാസന വനിതാ സമാജം ധ്യാനയോഗം മോർ മിലിത്തിയോസ് യൂഹാനോന്‍ മെത്രാപ്പോലിത്ത ഉദ്ഘാടനം ചെയ്യുന്നതും തൂത്തൂട്ടി ധ്യാന കേന്ദ്രം ഡയറക്ടറും ഇടുക്കി ഭദ്രാസന മെത്രാപ്പോലീത്തായുമായ മോര്‍ പീലക്‌സീനോസ് സക്കറിയ ധ്യാനം നയിക്കും. അന്ന് വൈകിട്ട് 6.30 ന് ഗാന ശുശ്രുഷയും തുടര്‍ന്ന് 7 മണിക്ക് ഫാ. ബിജു പാറേക്കാട്ടില്‍ പ്രസംഗിക്കും.ഫെബ്രുവരി 5-ാം തീയതി ബുധനാഴ്ച വൈകിട്ട് 6.00 മണിക്ക് ജീവകാരുണ്യ പ്രവര്‍ത്തനങ്ങളുടെ ഉദ്ഘാടനം പത്തനംതിട്ട ജില്ലാ കളക്ടര്‍ പ്രേം കൃഷ്ണന്‍ നിര്‍വ്വഹിക്കും.
93 നിര്‍ദ്ധനരായ ആളുകള്‍ക്ക് അരിയും വസ്ത്രങ്ങളും വിതരണംചെയ്യും. തുടര്‍ന്ന് 7 മണിക്ക് ഗാന ശുശ്രുഷയും, 7.30ന് ഫാ. അഭിലാഷ് ഏബ്രഹാം വലിയവീട്ടില്‍ പ്രസംഗിക്കും.
ഫെബ്രുവരി 6-ാം തീയതി വ്യാഴാഴ്ച രാവിലെ 5 മണിക്ക് പ്രഭാത നമസ്‌ക്കാരം, 7.30 ന് വിശുദ്ധ കുര്‍ബ്ബാന, വൈകിട്ട് 5 മണിക്ക് സന്ധ്യാ പ്രാര്‍ത്ഥന.ഫെബ്രുവരി 7-ാം തീയതി വെള്ളിയാഴ്ച രാവിലെ 5 മണിക്ക് പ്രഭാത നമസ്‌കാരവും, 7.30 ന് മലങ്കര മെത്രാപ്പോലീത്ത മോര്‍ ഗ്രീഗോറിയോസ് ജോസഫിൻ്റെ മുഖ്യ കാര്‍മ്മികത്വത്തിലും ജറുസലേം ഭദ്രാസനത്തിന്റെ മോമ തീമോത്തിയോസ് മാത്യൂസ്, മലബാര്‍ ഭദ്രാസനത്തിന്റെ മോമ സ്‌തേഫാനോസ് ഗീവര്‍ഗ്ഗീസ്, എന്നീ തിരുമേനിമാരുടെ സഹ കാര്‍മ്മികത്വത്തിലും വിശുദ്ധ മൂന്നിന്മേല് കുര്‍ബ്ബാനയും നടക്കും.
ലോകത്തിന്റെ വിവിധ ഭാഗങ്ങളില്‍ നിന്ന ്എത്തുന്ന തീര്‍ത്ഥാടകരെയും കാല്‍നട തീര്‍ത്ഥയാത്ര സംഘങ്ങളെയും 7-ാം തീയതി ഉച്ചയ്ക്ക് 3 മണിമുതല്‍ ഓമല്ലൂര്‍ കുരിശിങ്കല്‍ മെത്രാപ്പോലീത്താമാരും മോര്‍ സ്‌തേഫാനോസ് പള്ളി ഇടവകക്കാരും സമീപ ഇടവകകളിലെ അംഗങ്ങളും സംയുക്തമായി സ്വീകരിച്ച് കബറിങ്കലേക്ക് ആനയിക്കും. അന്നേ ദിവസം വൈകിട്ട് 5 മണിക്ക് തിരുമേനിമാരുടെ കാര്‍മ്മികത്വത്തില്‍ സന്ധ്യാ പ്രാര്‍ത്ഥന ഉണ്ടായിരിക്കും .തുടര്‍ന്ന്, 6 മണിക്ക് നടക്കുന്ന പൊതുസമ്മേളനം പാത്രീയാര്‍ക്കീസ് ബാവായുടെ പ്രതിനിധി ലബാനോനിലെ മോര്‍ സേവേറിയോസ് റോജര്‍ അക്രാസ് മെത്രാപ്പോലീത്ത ഉദ്ഘാടനം ചെയ്യും. സമ്മേളനത്തില്‍ മലങ്കര മെത്രാപ്പോലീത്തായും എപ്പിസ്‌കോപ്പല്‍ സുന്നഹദോസിന്റെ പ്രസിഡന്റുമായ മോര്‍ ഗ്രീഗോറിയോസ് ജോസഫ് അദ്ധ്യക്ഷത വഹിക്കും.അഖില മലങ്കര അടിസ്ഥാനത്തില്‍ സണ്ടേസ്‌കൂളില്‍ എറ്റവും കൂടുതല്‍ മാര്‍ക്കു വാങ്ങിയ കുട്ടിക്കുള്ള സെന്റ് ഏലിയാസ് ത്രിതീയന്‍ ഗോള്‍ഡ് മെഡല്‍ ദാനം ബഹുമാനപ്പെട്ട ആരോഗ്യ വനിതാ, ശിശുക്ഷേമ വകുപ്പ് മന്ത്രി വീണാ ജോര്‍ജ്ജ് നിര്‍വ്വഹിക്കും.തീര്‍ത്ഥാടക സംഘാംഗങ്ങള്‍ക്കുള്ള അവാര്‍ഡുകള്‍ മോര്‍ ദീയസ്‌കോറോസ് കുര്യാക്കോസ് മെത്രാപ്പോലീത്തായും തുമ്പമണ്‍ ഭദ്രാസനത്തില്‍ നിന്നുള്ള അവാര്‍ഡുകള്‍ മോര്‍ മിലിത്തിയോസ് യൂഹാനോന്‍ മെത്രാപ്പോലീത്തായും വിതരണം ചെയ്യും.
ആന്റോ ആന്റണി എം. പി., പത്തനംതിട്ട ജില്ലാ കളക്ടര്‍ പ്രേം കൃഷ്ണന്‍ എസ്. ഐ.എ.എസ്, ജില്ലാ പഞ്ചായത്ത് പ്രസിഡന്റ് രാജി പി. രാജപ്പന്‍, ചെന്നീര്‍ക്കര ഗ്രാമ പഞ്ചായത്ത് പ്രസിഡന്റ് തോമസ് ജോര്‍ജ്, ഓമല്ലൂര്‍ ഗ്രാമ പഞ്ചായത്ത് പ്രസിഡന്റ് ജോണ്‍സണ്‍ വിളവിനാല്‍, സഭാ വൈദിക ട്രസ്റ്റി ഫാ. റോയി ജോര്‍ജ്ജ് കട്ടച്ചിറ, സഭാ ട്രസ്റ്റ തമ്പൂ ജോര്‍ജ് തുകലന്‍, സഭാ സെക്രട്ടറി ജേക്കബ് സി. മാത്യു, തുടങ്ങിയവർ സംസാരിക്കും. സമ്മേളനാനന്തരം തീര്‍ത്ഥയാത്ര സംഘത്തിന്റെ ആഭിമുഖ്യത്തില്‍ വിശുദ്ധ മോറാന്റെ കബറിങ്കല്‍ അഖണ്ഡ പ്രാര്‍ത്ഥനയും ഉണ്ടായിരിക്കുന്നതാണ്.
ഫെബ്രുവരി 8-ാം തീയതി ശനിയാഴ്ച വെളുപ്പിന് 3മണിക്ക് മഞ്ഞിനിക്കര മോര്‍ സ്‌തേഫാനോസ് കത്തീഡ്രലില്‍ മോര്‍ മിലിത്തിയോസ് യൂഹാനോന്‍ മെത്രാപ്പോലീത്തായുടെ കാര്‍മ്മികത്വത്തില്‍ വിശുദ്ധ കുര്‍ബ്ബാനയും ദയറാ കത്തീഡ്രലില്‍ 5.15ന് പ്രഭാത പ്രാര്‍ത്ഥനയും, 5.45ന് മോര്‍ തീമോത്തിയോസ് തോമസ് (പരിശുദ്ധ സുന്നഹദോസ് സെക്രട്ടറി) മോര്‍ ഈവാനിയോസ് കുര്യാക്കോസ് (ക്‌നാനായ ഭദ്രാസനം) മോര്‍ പീലക്‌സീനോസ് സക്കറിയ (ഇടുക്കി ഭദ്രാസനം) എന്നീ അഭിവന്ദ്യ തിരുമേനിമാരുടെ കാര്‍മ്മികത്വത്തില്‍ വിശുദ്ധ മൂന്നിന്മേല് കുര്‍ബ്ബാനയും, തുടര്‍ന്ന് 8.30ന് പാത്രിയാര്‍ക്കീസ് ബാവായുടെ പ്രതിനിധി മോര്‍ സേവേറിയോസ് റോജര്‍ അക്രാസ് മെത്രാപ്പോലീത്തായുടെ കാര്‍മ്മികത്വത്തില്‍ വിശുദ്ധ കുര്‍ബ്ബാനയും, മോറാന്റെ കബറിങ്കലും മോര്‍ യൂലിയോസ് യാക്കോബ്, മോര്‍ ഒസ്ത്താത്തിയോസ് ബെന്യാമീന്‍ ജോസഫ്, മോര്‍ യൂലിയോസ് കുര്യാക്കോസ് എന്നീ മെത്രാപ്പോലീത്താമാരുടെ കബറിടങ്ങളിലും ധുപ പ്രാര്‍ത്ഥനയും, 10.30ന് സമാപന റാസയും നേര്‍ച്ച വിളമ്പും ഉണ്ടായിരിക്കും.പെരുന്നാളിനോടനുബന്ധിച്ച് വിവിധ സ്ഥലങ്ങളില്‍ നിന്നും കെ. എസ്. ആര്‍. ടി. സിയുടെ പ്രത്യേക ബസ് സര്‍വ്വീസ് മഞ്ഞിനിക്കരയിലേയ്ക്ക് ഉണ്ടായിരിക്കുന്നതാണ്. ദയറായ്ക്ക് സമീപമുള്ള പബ്ലിക്ക് ഹെല്‍ത്ത് സെന്ററില്‍ 24 മണിക്കൂറും ഡോക്ടര്‍മാരുടെസേവനവും ആംബുലന്‍സ് സര്‍വ്വീസും ലഭ്യമായിരിക്കും. ശുദ്ധജലവിതരണത്തിനുള്ള ക്രമീകരണങ്ങള്‍ കേരള വാട്ടര്‍ അതോറിറ്റി ചെയ്യുന്നതാണ്. ദയറായ്ക്ക് ചുറ്റുമുള്ള സ്ഥലങ്ങള്‍ യാചക നിരോധന മേഖലയും ഉത്സവ മേഖലയും ആയിരിക്കും.